حكاية ثورجى كان فى الميدان

عبدالله صقر

الحوار المتمدن-العدد: 3922 - 2012 / 11 / 25 - 02:48
المحور: الادب والفن
    

كان ماسك فى إيده عصاية
بيضرب بيها على ظهرى
من ورايا
كنت بهتف وسط الزحام
من جوايا
كنت بقول :
يسقط ( .... ) , ( .... )
ضربنى مرة على رأسى
ومرة ثانية على قفايا
ما دريتش بدنيانا
عينى زغللت ... سقطت على الآرض
وأعمى على , معرفتش اللى حوليا
وغابت عنى سمايا
أنا اللى كنت زى الحصان
اللى بيجرى فى سبق جوة الميدان
أنا اللى دوخت كام قائد مقام
وكام ضابط وشاويش
وتاريخى فى المظاهرات ما بينتهيش
أنضربت من عسكرى
وفين !!! على قفايا
أصل الحكاية
كانت ثورة
مكتوبة جوة كتاب
زى الرواية
........................................

فى زنزانتى
كانت بدايتى
مع قضبان وسجان
وضابط بيحقق معايا
قال لى :
أحكى لى حكايتك
يا إبن الكلب
قلت له :
حكايتى مع اللى سرقوا
هويتى وشقايا
حكايتى مع اللى سرقوا
هدومى وعشايا
حكايتى لازم أشيل
الخوف اللى معشعش جوايا
والظلم اللى عامل زى غطايا
.................................

يا باشا حكايتى مكتوبة من سنين
مع حاكم معندوش ضمير
واكل خير بلدنا
لدرجة أننا أصبحنا عريانين وجعانين
يا سعادة الضابط عاوزين بلدنا تتحرر
من شوية حرامية وفاسدين
لآن ظلمهم عم علينا من مئات السنين
لازم ... لازم نتحرر لآننا عايشين ميتين
يا سعادة الضابط ها أسألك سؤال :
ليه إحنا مكتوب علينا القهر من سنين ؟
......................................

رجعوتى لزنزانتى
بعد غلقة ساخنة من شوية سجانين
وزنزانتى كانت شبر فى شبرين
وبدأت حكايتى مع سجان من خلف القضبان
سجان ما يعرفش الرحمة للبنى أدميين
كل يوم أصحى على صوته الآجش
يضربنى برجله وعلى طول أكش
من الخوف أجرى وأضرب له تعظيم سلام
من غير دوشة أو أى كلام
أخيرا لفقوا لى أتهام
وهو محاولة قلب النظام
قلت لهم :
الكلام ده موش تمام
خوفونى وقالوا لى :
ها تاخذ إعدام
قلت لهم :
الآعدام أهون على من إنى أعيش
مسلوب الآرادة من العصابة اللى حوليا
يا يعادة الباشا
دى عصابة عاملة زى الكماشة
لازم نتحرر منها عشان نعيش
وعشان الآيام الجاية
ما نعانيش وعشان نحلم ببكره
وعشان ما يكنش فيه قلوب
طالعة تكره
ودى حكايتى مع السجن والسجان
من وراء القضبان

#عبدالله_صقر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات