رباح مرزة خضير
الحوار المتمدن-العدد: 3906 - 2012 / 11 / 9 - 05:45
المحور:
كتابات ساخرة
الموظف على باب الله ..... والفقير الك الله
أول ماخرجت من دارنا أصابحت بواحد من زملائي الخريجين الكانوا معاي بالجامعة سلمت عليه وسألته على أخباره فجاوبني ,,هذا حالي طالع أشتغل عماله أو منتضر التعين , تفاركنا لأن أثنينا كنا مستعجلين هو يريد ايروح للعماله واني اريد اروح للجامعه...فدا أمشي اسمعت طك استكاين وريحة هيل طيبه من بياع جاي أبسط على (جنبر) بالرصيف أشربت جاي أو مشيت, وقبل ما أوصل الكراج دكلي هورن سايق كيا_ باص 11 راكب_ كالي للجامعة اركبت وياه و حركت السياره فبادرة بسؤال للسايق شعجب طالع على الفارغ بدون عبريه؟ فكان جوابه ,, أشرلي بأصبعه على سايق كيا طابك على السره بالكراج كالي شوف هذا مدير مدرسه يشتغل سايق الصبح من دوامه عصري وابنه معلم يشتغل بالباص الظهر اذا كان دوامه صبحي ,,أو من تسألهم يكون جوابهم على باب الله .....
على العموم السايق هم طلع خريج أو مزوج أو مسوؤل أقتصاديا على عائلة أخوه المتوفي ,أو ما كدر يوصلني للجامعه بسبب الازدحام, فأضطريت أأجر تكسي ,ويه ما أشرت طبكت سياره حديثه ( أوبتمه ) أصعدت وياه فكانت سيطره مسببه الازدحام فالسايق عبر على السايد الثاني أو سلم على الشرطه او طلع ,,,, فكتله يمعوده شيخلصنه اليوم ,,,جاوبني لا ادير بال أني منتسب وياهم , أني شرطي وبيوم أستراحتي اشتغل تكسي على باب الله....
وصلت للجامعه وانتهت شغلتي وكان بوقتها الامتحان التنافسي للدراسات العليا فصارعندي حب الفضول أطلع على الاسئله التنافسيه , فلفت أنتباهي الولد الأشربت يمه جاي الصبح ,كتله خير خو ما محتاج شئ - لان كنت اصور محتاج وضيفه عامل خدمه بالجامعه لمهارته بتخدير الجاي أو طكت الاستكان- فكان جوابه ,,,, أني موظف او زوجتي موظفه واجينه نمتحن دراسات عليا , كتله و(جنبر) الجاي ,,,,جاوبني على باب الله.....
أرجعت او بالطريق أضرب أسداس بأخماس وأفكر بالمواقف المرت بيه اليوم أو بديت أذكر فلان معلم يشتغل بسوك المخضر بكال ,وفلان مدرس يملك محل موبايلات ,وفلان مهندس يأسس كهرباء ,وفلان موظف يشتغل بتأسيس المي والمجاري ,وفلان أو فلتان مسيطرين على كل المحلات التجاريه وخاضعتلهم كل المهن الحرفيه , أو يمكن بعض الموضفين بس عايزلهم يشتغلون صباغين أحذيه لو حماميل بالشورجه ,,,,, والفقير الك الله ....
وبهلحظه انفجر تاير السياره يعني (بنجرت ) أمام معرض لسيارات الصالون الحديثة ,فأنزلت وظليت أتفكر على المعرض فلمحت أستاذ جامعي وياه اصدقاء قدماء الي واحد موظف بالماليه أو واحد بالصحه صرت أسلم عليهم وبعد السلام كتلهم خو ماكوشئ اليوم بالمعارض ؟؟ جاوبني الاستاذ الجامعي على باب الله ,,,,, وأنتم جاوبوني مثل ما جاوبك الاستاذ هم على باب الله.....
فالموظف على باب الله ....والفقير الك الله .
فكاهة بين حافي وشبعان
ونحن بمعرض النقد البناء لأهمال الدولة بقوانيين التوازن الاجتماعي وفقدانها لنظام التسوية في تطبيع الطبقية واثارة السخرية اللاذعة للموظف المتقاعس على شرف وظيفته وعدم الأحترامية لمهنته النبيلة ,والنتيجة المؤلمة التي نستشاط منها حرقة هي مواطن بائس اجتماعيا ومنحط في الطموح ومحروم من مسح يد الدولة العطوفة على أبناها.......
حيث سمعنا من مربينا الكبار أن ثمت قوانين ممنهجة اجتماعيا أصدرت في سبعينات القرن المنصرم تبت بعدم أحقية موظف الدولة الجمع بين الوظيفة ومزاولة أعمال أخرى ,لأثار السلبية التي تتركها في جسد المجتمع فهي تفسد شرفية الوظيفة وتقلل من أحترامها ومن زاوية تنافس غير مبررعلى حقوق اصحاب الايادي العاملة والكسبة وارباب المهن ,بالاضافة الى المخلفات الطبيقية التي تجذرها في الجيل الصاعد وبذلك تنهار العدالة الاجتماعية وتسقط مبادئ المواطنة وتتصدع أسس ديمقراطية مناصفة العمل وتوزيع المهن والحرف ......
ناهيك عن واجبات الدولة في وضع خطط موضوعية اقتصاديا ومتكاملة اجتماعيا من حيث سلامة خزينتها من جهة والتقسيم العادل لوظائف الدولة تحت( مبدأ الأحوج فالمحتاج) من جهة أخرى.... ,وبما أن الدولة (هي المؤسسة التي تتمتع بالأحتكار المشروع للقوة في المجتمع) لذا من مقتضيات الدولة وضع مشاريع مدروسة بأستفاضة وجدية لمناصفة الوظائف من حيث قراءة ميزانية الاسرة الواحد بعدد موضفيها ,فنرى أن هنالك عوائل تملك اكثر من موظف وعوائل معدمة من الوظيفة , فلو كانت هنالك قراءات صحيحة ودراسة صادقة ضمن جدول بياني مضبوط بتوفر فرصة تعين واحدة لكل عائلة لخفت وتيرة التظلم المهني المحدق بالأسر المحرومة وظيفيا وبذلك تصرف الدولة السوء الاجتماعي من حتمية الفوضى وتقلص فجوة الطبقية عن كاهل المواطن العراقي ,,بالاضافية الى الكثير من المشاريع الضخمة التي تستطيع الدولة بواسطتها قلع جذور البطالة التي لا يسع المقام لذكرها لانها ليس من صلب الموضوع .......
( بالقابل أقدم كبير تقديري وخالص أمتناني وعظيم أحترامي الى كل موظف نبيل محترم خلع لباس الذل المدلهم بالطمع والجشع وتوشح بزي الملوك والامراء والاكابر ليضفي على الوظيفة بريق من نور الكرامة والسمو والرفعة........)
#رباح_مرزة_خضير (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
