جهاد علاونه
الحوار المتمدن-العدد: 3897 - 2012 / 10 / 31 - 14:09
المحور:
كتابات ساخرة
-مرحبا.
-أهلين كيف الحال؟وينك يا زلمه ليش بطلنا نشوفك إلا مثل البدر بالشهر مره؟
-والله الحمدُ لله ماشي الحال,عال العال,ماكلين شاربين نايمين ومدخنين,من البيت للشغل ومن الشغل للبيت,إلمهم إنت كيف حالك وأحوالك خبرنا وش هي إعلومك؟
-والله إعلومي كلها زينه,جوزت البنت الكبيره وجوزت من أولادي الثلاث ولدين,وانت شو أخبار الأولاد وأم الأولاد؟
-والله مشغول بالسيارة قلبت معي وانا ساحب وطايرفيها.
-شو إنشاء الله ما في أضرار؟.
-لا كله عادي,السيارة صار فحصها 1 جيد وغيرت الزجاج والهيئة الأمامية والخلفيه والدواليب يعني سليمه ما فيهاش ولا إشي.
-يا سيدي الحديد عمره انتهى والمصاري إذا راحت ما بيجيش بدالها بس الشرف عادي من الممكن تعويضه,إلمهم شو أخبارك إنت؟وكمان شو أخبار أبوك.
-أبوي صار عامل 3 عمليات قسطره وصاروا الدكاتره حاطين ليه 3 شبكيات,ومعاه الضغط ومعاه السكري وقبل يومين فقط لا غير عمل عملية قلب مفتوح,وقبل سنه عمل عملية معده مقلوبه,ومن السكري صاروا قاطعين ليه 3 أصابع من أصابع رجليه,يعني ما فيهوش إشي وحالته عال العال وبوكل وبشرب وبنام.
-إي والله شو بده أحسن من هيك عيشه!!!أهم شيء الإنسان يوكل ويشرب وينكح وينام.
-والله الحمدُ لله شو أخبارك إنت؟
-الحمدُ لله,اليوم كنت أفكراشتري للأولاد نص كيلو (عوامه)+نص كيلو هريسه,الله وكيلك اليوم اصرفت أكثر من دينارين و60 قرش..يعني شو بدنا إنساوي..بعين الله.
-يا رجل لويش التبذير ...لويش امغلب حالك؟ لويش البعزقه على اليمين وعلى الشمال؟.
-ما عليك خلي الأولاد يوكلوا ويشبعوا.
- الله يقطعك كل كلامك مجرد طرح وكمان بتقول خليهم يوكلوا وانت مش جايب إشي.
- يعني بعين ألله.
..المهم إنت شو إمساوي مع الأولاد؟.
-والله إمبارح عقدنا عقد الولد على بنت أبو شوقي.
-مين أبو شوقي؟.
-يا زلمه أبو شوقي الضرير الأعمى إللي دايمن قاعد على باب الدكانه اللي ساكن في حارة المساطيل..شو ما اعرفته؟.
-أيوه..أيوه...هسع اعرفته مش هذا أخو الطويله الهبلى المجنونه اللي بقينا وحنا أولاد إزغار نركض وراها بالحجار؟.
-أيوه بالضبط اللي بنته الكبيره معاها شلل نصفي,يعني شو بدنا أحسن من هيك عائله,والله إنهم جماعه محترمين وسلالتهم من أعرق السلالات في المنطقه.
-أي إنت جاي إتقلي!!ما أنا عارفهم واحد واحد,مش أبو شوقي اللي ابنه شوقي انحكم 5سنين على القضيه إياها؟.
-أيوه رحم الله والديك,هذا إنت يا زلمه إطلعت ابتعرفهم أكثر مني!!
-أي كيف لعاد,شو يا زلمه هذي الدنيا صغيرة جدا..بعدين هذول عائله مشهوره بمرض العشاء الليلي كلهم بالليل ما بشوفوش نهائيا.
-كلامك صحيح.بس والله إنهم محترمين وعندهم نظر بدليل إنهم قبلوا بنسبنا وشرفونا وشرفناهم.
-شو!!!وانشاء الله خطبتله بنته المشلوله؟ زي ما حكيتلي .
-لا يا رجل شو المشلوله!...خطبناله أختها إل أصغر منها بسنتين.. اللي قبل 5 سنوات انقلعت عينها لما كانوا يفرطوا زيتون بالحاره الشرقيه.
-أيوه يا زلمه خلص اعرفتها مش هذي اللي أخوانها كلهم معاهم مرض التوحد؟.
-لا يا رجل هذول أولاد خالتها وعمها في نفس الوقت اللي معاهم مرض التوحد ما فيش لينا ولا ليهم دخل فيهم,هذي أمها اللي كان معاها مرض السرطان..بس هسع الحمد لله طلع السرطان اللي معاها عباره عن غده حميديه,بس المسكينه معاها جلطه على شبكية العين ومعاها السكري والضغط وهشاشه في العِظام,والحمدُ لله عايشه على الأدويه الشهريه,وبتشرب الأنسولين زي ما إنت بتشرب الماء البارد,يعني أمورها والحمد لله تمام التمام وصحتها زي البُمبْ
-والله الظاهر إنها العروس ما فيش عليها أي عذروب(عيب) ومشاء الله جامعيته من كل النواح,حسب ونسب وشرف,وتاريخ أخوها...وسجل العائله المرضي..وأمراض وراثيه بسيطة,وين بدكوا تلقوا ناس أحسن من هيك؟.
-إلمهم إنهم عائله مستوره.
-والله إنك صادق,وين بدكوا تلقوا ناس أحسن من هيك بعدين هو الواحد شو ماخذ معه من الدنيا؟.
-لا شيء.
-بعدين المرض والصحه من الله.
- يا زلمه كل هذي الأمراض معها وبتقول ما فيهاش إشي!!!...طيب هو الولد وين بده يسكن معاكوا في نفس الدار(الخرابه)؟.
-لا والله بنيناله يعني عمرناله بيت مستقل(ديلوكس)على آخر موضه وعلى آخر صرعه.. ناقصه بس سقف وقصاره وبلاط وطراشه ودهان وجبصين وبده تمديدات كهربائيه وناقصه كمان الأبواب والشبابيك..يعني إبتقدر إتقول إنها داره جاهزه,وعشان عنده دار قبل أبو البنت يعطينا بنته.
-يا زلمه شو قِبل وما قِبل يعطيكوا بنته؟أي هي كاينه دين أو قرضه الله حسنه!!.
-يعني شو بدنا نعمل؟.
-يا زلمه هذي الدار ناقصها كل شي.
-شو بدنا إنقول الحمدُ لله..واليوم رحنا إشترينا للعروس إشوية ذهب بقيمة 150 دينار أردني وأخذت العروس هي وأمها وأخوها المعتوه على المطعم وغديتهم غدى دسم في أفخم المطاعم,صحنتين وعافيه على قلبهم,طعميتهم حمص وفول و40 حبة فلافل مع إشوال بصل,الله وكيلك العروس لحالها أكلت نص إشوال البصل مع الحمص والفول..وقلت مش مشكله خليهم ينبسطوا ويترفهوا,وجبنالها ملابس جديده من(الباله) بقيمة 25 دينار أردني وحسبنا حساب كسوة للشتاء والصيف.
-شو يا زلمه كنك داخل سحب خيري ويانصيب؟.
-والله إنك ضحكتني,لا سحب ولا ما يحزنون.العروس لُقطه والعريس كمان لُقطه.
-طيب شو أخبار خالتي أم (عماد)؟.
-خالتك جوزها بعد ما مرضت بالسرطان بشهر واحد راح إتجوز عليها وطلّعها من الدار وسكنت محلها العروس الجديده,المسكينه مضت حياتها معاه وهي تعبانه وشقيانه حتى بنت الدار وآخرتها طلعها جوزها منها,يعني أمورها إكويسه وتحمد الله على النعمه اللي هي فيها,والله إنها مبسوطه وعايشه بألف نعمه وخير.
-صحيح..كلامك صحيح,لو إنها إتشوف وتطل على غيرها غير إتلاقي حالها أحسن من غيرها بمليون مره.
-يعني شو بدك اتساوي هذي الدنيا كلها هيك,بعدين المسكين الزلمه بقدرش يقعد بدون(مره) الزلمه بده مره تخدمه.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
