من حجايات كَبل/الدين افيون الشعوب

عبد الرضا حمد جاسم

الحوار المتمدن-العدد: 3836 - 2012 / 8 / 31 - 15:53
المحور: العلمانية، الدين السياسي ونقد الفكر الديني
    

من حجايات كَبل/2
الدين افيون الشعوب
كَاعدين والاستاد(اكبرهم ) يشرح و يْفَسِرْ...وابن الحجي(الحاج) شايل(ينظر اللى السماء) راسه للسمه ...
كَاله الاستاد...ها رفيق اكو شيء.... شو جنك مو يمنه(كأنك لست معنا)... طابلك بدالغه....ماخذتك حسبه...سولفلنه احنه رفاقك
رد ابن الحجي ...لا رفيق انه وياكم... انه يمكم
كَاله الرفيق ...وين يمنه...شو كاعد وشايل راسك لَفوكْ... من كَعدنه لهسه ...بعد وين يمنه...و لا جنك ...وبالك مويمنه...... شكو بالسمه...لا هيَّ ليل والكَمره حلوه... تحسب انجوم؟ ...وين وصَلِتْ.؟
كاله لا رفيق ... و أم هاشم (فواده)انه وياكم ...وبالي يمك... أوأحَّسِبْ بسوالفك....الدنية وين او هاي وين....مصيبه يستاد ...مصيبه جبيره.
كَاله الاستاد ما مبين عليك...انت عندك حسبه... كَولها...ليش تخليهه مترخمه عله كَلبك او كاتلتك ... طلعها لا تخلي شي بكَلبك...كَول
فقال ابن الحجي(الحاج)... احنه دايخين بين التسولف بيه(الذي تقوله) و بين النشوفه بعيونه.... ذيج وين او هاي وين ....ها التشوفني اكَعد الله بالخير و اكَوم الله وياكم ...جا بعد وين افيون الشعوب...اذا احنه مْخَدَّرين من أبطون امهاتنه...الام تنطينه نُّوام وتكَمطنه حتى نهود وانام من الجوع لو تخلينياه بالفوح لو بالماي ونضل انمص حته انام...لو تخلي بحلكَنه لهو نمصمص بيه.
خليني بحسبتي...عبالك بس اليباوع و فاك حلكة عليك يعرف شتكَول... وعبالك هو الزين ...انشد(اسأل) البصفك(من بجانبك)...الفاك حلكَه و عيونه عليك وهو و لا يمك ...ويهز براسه جذب...
انشده اذا طلع سامع شي انه أمْعَتَبْ
عيونه بعيونك وباله يم الهايشه...اذا فطست الهايشه...ههه... كَول بعد ما تشوفه..
سأل الرفيق ... البصفه (الجالس بجانبه)... صدك هذ الحجي(الكلام)...
نب ابن الحجي(الحاج) وكَلَهَ: استاد انشدني بَلَّوْل(أسالني أولاً) اشسولفت (ماذا قلت)حته تتأكد انه بالي يمك لو لا... وما مدولغ
انت حجيت كيت وكيت وكيت...وسولف اشحجاه الرفيق...
إعْتِذَرْ الرفيق ودار راسه عله البصفه كَاله...... رفيق صدك حجي(كلام) ابن الحجي(الحاج)...
كَاله اي والله رفيق متعارضه الهايشه حشه قدرك والجماعة... صارالهه يومين ...وتدري احنه حِليبَتْنهَ وروبَتْنَه منها ومن اختها
كَاله: ليش ما وديتهه للبيطرة...
كَله رفيق بيش اوديهه... بالعربانه...اصعدهه عله مطي (حمار) ...والبيطرة لا هنا و لا هنا بِعِيدَهَ و ماعندي كَرْوتها(الأجرة)...قابل أئجرلي(استأجر) قجمه(سيارة مرسيدس قديمة ) علمودها
كَاله الرفيق: زين انت روح...وَّحَدَكْ او شوف الْبِيطَرْي وسولفله... اكيد راح يساعدك ويطيك الدوه
كَله رحت للبِيطَرَةْ...كَالولي جيبهه وتعال...بيش اوديها
قال الرفيق: انت مو تعرف الطبيب البيطري هوه من يمنه...
كَاله رفيق اعرفه خوش آدمي وصخي و ما يقصر بس ماهَّوَ... كَالوا مجاز تلث تيام لان امه ماتت...وباجر اخر يوم بلكن اروحله عكب باجر... كَالوا يداوم.
كَاله الرفيق: ادري المرحومة ماتت و يوميه انه بالفاتحة ...اليوم اكَله أمْنَ اشوفه بالفاتحة
كَاله رفيق هو ابن اوادم او ما يقصر....بس من يكَول اتظل عدله(لم تمت) منا لباجر...لعكَب باجر(بعد الغد)
كَله الرفيق: اذا هيج مُخُطْره ...غير تكَول من الاول...جان مطيني خبر وي المحروس ابنك... واحنه مثل اخوتك...
ابشر اليوم احنه يمك انه والدكتور وره ما تكف الوادم من الفاتحة(بعدما تنتهي الفاتحه)... استرخصه واجيبه يمكم ...بس كَلي هي اشبيهه حتى اكَله يرتب اموره... بلكي عنده شي شياتين يجيبهن وياه ...دوه غير شي
واذا ما كَدرنه نجي اوصار الليل... احنه باجر من الصبح يمكم لان الدكتور يكَعد يصلي الفجر او وي طلعت الشمس نركب او نجيكم... انه مدرستي باجر(غداَ) العصر والفاتحة الصبح اخوته يكًومون بيها.. وهو مجاز...
و ها...اسمعني زين... لا تكلف نفسك ... اذا اجينه كَبل الغروب ما نتعشه يمكم ...تره... اذا تسوي شيء يظل بمكانه... ماناكله ...لا انه ولا الدكتور...أتْحَرْمَه بلاش....ومن يكَول نجي...يجوز الدكتور عنده خطار يتعطلون يمه بالفاتحه... واذا اجينه الصبح احنه متريكَين او جايين... بس نشرب جاي(شاي) يمكم...
كَله استاد هذا فضل ما انساه لا انه و لا عيالي... لمن اموتن...ويظل معلكَ بركَبتي الك وللدكتور.
كَله الرفيق :كَلي شكَل للدكتور عليها...شبيهه...شمبين عليها
كَله مخنطله(خامله) وما تاكل وحلكهه يرهول(لعاب من الفم) وما تكَدر تكوم (لا تستطيع الوقوف)وانه اخافن تْعْدي اختها... تعدي الحلال...تعدي حلال الوادم....ولو انه عزلتها عن الحلال.
كَاله الرفيق: أتدلل... الدكتور مثل ما تعرفه ما يقصر...ابن اوادم
نب ابن الحجي وكَال: ها استاد شكَتلك ...موكَتلك باله يم الهايشه مو يمك...
اجاب الرفيق...هو ما كَال...انت ليش ما كَلت.... وانت شلون عُرَفِتْ...
كَاله...لاكَيته الصبح يم البيطره وراد ما يجي اليوم للاجتماع كَتله لا تعال بلكي الاستاد يلكَالك حل ...ربعه هوايه...وهو استحه يكَلك...عود كَبل لا تروح يتكتر اوياك(ينفرد بك) ويسولفلك.
المهم بيهه صالح...انشالله تصير زينه
بس رفيق بروح موتاك... عندي سؤال ترخصني... اسالك...
كَله...مرخوص كَول... اذا محتاج اي شي اكَدر عليه انه كَدامك...كَول.
كَاله: رفيق رحمه لوالديك ...انت صارلك ساعتين تحجي عن الدين...شكَال الدين وشكَال ماركس والدين يخدر الوادم ... اذا الدكتور يصلي ويصوم شلون يمشي وياك ...هو يعرفك انت شوعي...مو يكولون الشوعيه كفر
كَاله ياهو اليكَول
كَاله استاد روح للجامع واسمع الحجي من يجيبون طاري المناشير والشوعيه
اجاب الرفيق: الدكتور انسان يفتهم و متناقشين انه وياه بالموضوع وهو يعرف هذا الجحي جذب ...لاله اول و لاله تالي......حجي يقشمرون بيه الناس حته يظلون يْكَّفْخون بيها.
الشوعيه ما تريد أتْهَدِمْ الْجُوامِعْ... بس تريد تفهم الوادم بالصدكَ.... تريد الوادم تشتغل و تعيش عيشه زينه...وماتريد تجي الناس و تحبب بيدين السيد لو الشيخ وتكَله ادخيل جدك... تدخل عليه ...دخيل جدك ما دخيل جدك...وهو جده ما نافعه هو و لا نفع روحه...يالله ينفع الوادم
انت مو تروح للفُواتِحْ(جمع فاتحه)....كَاله اي رفيق... اهلك او عمامك مو تلث ترباعهم يْصَّلون و يصومون...كَاله صدك... هم يوم شفت واحد ادنه(ابتعد) عنك من كَعدت يمه(جلست بقربه)....لوكَلك انت كافر كَوم عني... هم سِمَعِتْ واحد كَال عنك نكَس(نجس) كافر...
كَاله لا...ابد ما كو هيج شي...
بس رفيق مو انت كَلت ذيج المره واليوم هم عدتهه من نِشِدَكْ(سألك) فلان... الدين يخدرون بيه الوادم...ويضحكون عله عقولهم بيه.
كَاله أي كَلت... انت نشدتني ذيج المره شني معنه( افيون الشعوب)...شرحتلكياهه وانت جنت توك كَايم من العملية...فمثلتلك اياهه... كتلك مخدر مثل هذا الطوكياه من كَصولك المصران الاعور... مثل الابره الضربوكياهه كَبل العملية وما حسيت بالعملية...
وتتذكر اشكَلت
كَاله اي اتذكَر... كَلت زين...جا لو بلايه المخدر جان ابوي اشتعل وهمه أيْكَصَّبون بيه.
جال يش بعد تحجون عليه رفيق اذا هو يساعد الوادم المرضه...كضاله حقك ...بس لو ما مسويلك العمليه..شيصير...لو بس مطيك المخدر و مهودينك يشيصير...مو جان طك الكصران او متت...هذا الدين يخدر ما يخيك اتحس لمن تموت ويكَلون كلمن بيومه.
او تتذكر من انت كَلت يخدرون كَلتك يخدرون يعني مثل ما يسون جاي (شاي)...يخدرون جاي عله روثات...ساعتين تلاثه ما يخدر ...والوادم تنطر و ما كو قبض...اطْكْ ارواحه واتكَوم وتكَل للمخدرجي اودعناكم اغاتي نشرب الجاي بالفرح ان شالله...او هو وين اكو فرح... ويْلَهَّونْ بيه الوادم ... اتظل الستكاين خاليه... والوادم لا شغل و لا عمل بس حش جكَاير أو طَكْ فج او كَص بالجاي والرايح...فلان طويل ...فلان كَصير . فلان عَرْضه فلان تركه(يشربون السيكاير و يذكرون الناس بالسوء).
هذا الحرام البيه ...اليكَضيهه نوم... ما يشتغل... وعياله ميتين جوع... هذا موحرام عليه؟ والله شني يصلي و يصوم...الصلاه والصوم... تشبعك خبز...تلبسك هِدوِمْ(ملابس)....تداويك.
وتتذكر من جبت وياي الكتاب ذيج المره وشفت صورة ماركس اشكَلت...مو كَلت هذا لو يلبس اعماه جا طلع مثل ابن سيد فلان التصلي وراه الوادم ويحبون ايده...وكلت وجهه فِليحْ... بيه نور محمد ...كَلت لو لا؟...كَله كَلت رفيق...وهسه او بعد اكَولهه
شلون بعد كافر
ثم اكمل الرفيق :كَاله من اجي وي الدكتور انت والدكتور تلتهون بالهايشه وانه اشرح لستار ابنك ...لن هو كُبَرْ او يفتهم وخلي هو يشرحلك ... ايفهمك زين... و من نتلاكَه مره ثانيه تسولفلنه شكَلك ابنك ستار لن انه متاكد يعرف شيكَلك وهو هسه ماشالله بلثالث متوسط وذكي بالمدرسة...
بس المهم هسه الهايشه...تصير زينه.
في القاء التالي استفسر الرفيق من ابو ستار عما فَهِمَ من كلام ستار له فقال:
انه كَلت هالوجه الفليح وهالحيه الْشِرِيفَهْ(صورة ماركس) ما يُكْفُرْ و لا يسوي طلايب ...
كَله الرفيق: سولف النه شكَلك ستار... حته اعرف ستار افتهم الموضوع لو لا
كَاله يكَول الحجي(الحاج) ابو لحيه(اي ماركس...هو معجب بلحيته مثل العزيز مثنى حميد)**
...الدين...يكَول الحجي(الحاج اي ماركس) مثل الْنِفَسْ الحار مال الحسرة الْيِطَلْعَه المقهور المشلوع كلبه (اشاره الى زفير المخلوق المضطهد) مِنْ يْتْحَسَّرْ المظلوم ويْطَّلْعْ القهر الِبْكَلْبَه ... يرتاح أشْوَيه...بس ما تسويله شي ...و لا تْرَيْحَه دوم و لا تحل المشكله
أو كَالْي تلتهي الوادم بالصلاة والصوم والقرايات و لا شغل او لا عمل كَولتن الله كريم والرزق عله الله ويتعذب البنادم بعيشته و ينذل(اشاره الى الشقاء اليومي هو تعبير عن الشقاء الواقعي)
والدين أيْرَيْحَكْ جذب(كذب)(اشاره الى ان الدين سعادة وهميه والمطلوب سعادة حقيقيه)... و تذب همك عله الله حته تْخْدَر...ْ وكلشي ما تسوي... وتنام وانت تعبان مظلوم وما مرتاح من كلشي... شلون المشلوع كَلبه وابوه مسموط و من تكله شلونك يكَلك الحمدولله والشكر
الحمدولله... عله شلعان الكلب... عليمن عمي... ع العوز... ع الظلم... والشكر عليمن عمي ...شمحصلين احنه حتى نشكر الله...
هذه اليخدر الوادم ويطيح حضهه و يخليها كَاعده بس تندعي... وتضحك جذب والنار مشتعلة بافادهه(الفؤاد)... وتالي ماتالي يطيح حضهه... و تعيش بالذل... وهي ساكته كَولتن المُوْمِنْ مبتلي...
يدي(الجد) شكَد صارله يندعي بلكن أيْهوِدْ راسه وشكَثر راح للسيد وقره عله راسه...وفركله راسه...حَصَّلْ شي...لا وستار صادك ...لكن صدك من راح للطبيب واطاه الدوه صار زين
و كَالي ستار...هم يوم نشدت روحك ليش السيد ما يدعي لروحه بلكن الله يرجعله عيونه...ليش ما يقره عليها...جدي اشكَد يندعي بكل صلاة بلكن الهايشه تصير زينه اشحصلنه ...لو ما جاي الدكتور و مداويها(اشاره الى نقد الدين يحطم الاوهام).
كَالي ...من باجر بعد ما تروح تحش للحلال اندعي من الله يحش الهن ويجيبلهن الحِشْيشْ وشوف شراح يصير(اشاره الى النشاط والتفكير ليصنع الانسان واقعه)
كَالي الدين يفتر عله ابنادم ويدوخه وما يخليه يشتغل ...اليوم اريدك ما تسكَي... وتروح للسيد خل يندعيلنه كون تمطر الدنيه بتموز...اذا مطرت ...احسب كل سوالف السيد صدك.
انه صفنت عله حجي ستار منين جاب هاي السوالف وياهو القره براسه ما صدكَت انت من كَتله ذاك اليوم هو صدكّ....لا هاي السوالف مال واحد جبير و مو مال اليوم لو البارحه...
كَتله ولك ياهو المعلمك هذا الحجي ما انطاني خبر....النوبه نسمع من الزغار...ولله وكت...هاي كلهه من المدارس و المعلمين المثلك و من المناشير.
يا ستاد...صدكَ حجي ستار... السيد ليمته ما تروحله وتكَله ع الظلم وع المشاكل يكَلك الله كريم...اصبر...ايوب اشكَد صبر...ههههي... ههههههي يلله ... شجابني ل َأيوب...يكَلك المُومِن مبتلي... والله يريد يمْتِحِنَّهْ بالدنيه حتى نرتاح بالاخره.
اهومده الاخره...اهوامده الاخره...اهوامده لاخره هاي تلث مرات.... اذا انه ما محصل شي بدنياتي...او ما شبعان خبز... او ميت من قهر... والحوافيف ياخذون الاكو والماكو...وياخذون حك ابنادم... و ها لاتنسه حكَ السيد...جا السيد تعبان وياي حته اطيه حكَه... هو انه ياهو المطيني حكَي حته اعزل منه حك السيد...وشعده حك ...السيد يمي...حك جده...ههه جا جده ما ينزله حكَه من السمه
حته من يريد اينام ابنادم او راسه بارد ما يخلونه...حته من يحط راسه ع المخده و يريد أيْهَّوِدْ اشويه ما يخلونه.
كون ينام وحسبه تاخذه وحسبه تودي... باجر شيوكل اعياله ...شلون تغمض عين المعتاز وينام ما ادري...همه يريدونك تنام وانت جوعان وتشكر الله. وكون بنادم ينام ما يْحَّسِب شيْخَّلُفْ لعياله من يموت ...الله كريم و الله ارحم الراحمين...وهاي هيه...جا ما رحم الكَبلنه...يدك والعِشه خُباز...او ويهه هاكَدَّه(وجهه اصفر من الفقر و المرض)...تكَول كاغد اصفر
كَولتن الرزق مقسوم ومْقَدَّرْ.... والله يرزق بلايه حساب... يموت وما يخلف شي لعياله غير القهر والعوز. بس المهم يصلي و يصوم ويندعي او يلطم والزق عله الله.
هكذا عَلَمَ ستار والده معنى قول ماركس(ابو وجه الفليح البيه نور محمد)الدين افيون الشعوب
وواصل الرفيق علاقته مع ستار الذي قدم حياته بعد ذلك فداء للفقراء وهو مطمئن انه لا يريد العيش مظلوماً محروما وفَضَّلَ ان يموت مظلوماً لأن العيش مظلوماً هو الموت مظلوماً ببطء وعذاب واذلال.
تحيه لكل من كان ضحيه لتحريف قول ماركس( انه افيون الشعوب)... والخزي لمن نشر هذا التحريف... وساهم بقتل الابرياء...
و مات المُحَرِفونْ والمُحَرِفينْ ميتةً مخزيه اما تعذيبا او اغتيالا بيد من خدموهم بتحريفهم لهذا القول الحكمة.
و الى سالفة اخرى
**تعليق العزيز مثنى عن لحية ماركس:
في تعليقه المثبت على موضوع يعقوب ابراهامي المعنون(بيان الشلة)المنشور بتاريخ28/05/2012 الرابط
http://www.ahewar.org/debat/show.art.asp?aid=309533
حيث يقول:
12 - ولكن لماذا ومن قال!
2012 / 5 / 28 - 18:51
التحكم: الكاتب-ة مثنى حميد مجيد

...................يذكرنا برائحة أهلنا الشيوعيين القدماء ودف سترة ماركس ومهابة لحيته وسخرية عيني لينين ......................؟؟)**

#عبد_الرضا_حمد_جاسم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات