دردشة مع كندي

لؤي عجيب

الحوار المتمدن-العدد: 3818 - 2012 / 8 / 13 - 09:08
المحور: الادب والفن
    

مبارح زرت شركة كندية وقابلت المدير الكندي وطبعا أول ما عرف اني سوري الجنسية دار بينا حديث بس مغاير تماما لأحاديث هاليومين عن سوريا :
- أنت من سوريا .. سوريا بلد جميل ..
- بتعرف سوريا .. يعني زرتها شي مرة ...
- طبعا .. زرتها أكتر من مرة ... وأنا بحب روح سوريا .. لأني بستمتع هنيك..
- طيب شو أكتر شي لفت نظرك بسوريا ..
- الناس بسوريا بترمي الزباله بالشارع .. علب الكولا .. بقايا السندويش .. المحارم .. كلوا بيرموه بالشارع ...
- وأنت عم تزور سوريا حتى تمارس انسانيتك وترمي الزباله بالشارع يعني ...؟؟؟
- هههههههه .. لا .. لا أكيد .. لا ... أنا بشوف الناس السوريين حضاريين ..
- حلو ... طيب شو هو الشي الايجابي يلي لفت نظرك بسوريا ...
- عم احكيلك ... الشعب السوري حضاري جدا ...
- وكيف اكتشفت هالشي ..؟؟
- لانه بيفهم بالحكي مو بالعقوبة ...
- كمان ما وصلتني فكرتك ..
- بقصد ... ما ضروري تعاقب السوري حتى يتعلم ... مجرد حديث صغير بيعتبر مباشرة ...
- كويس ... طيب كيف لمست هيدا الشي ..؟؟؟
- انا .. شفت أكتر من مرة شرطي يوقف سائق مخالف .. ويحكي معاه وما بيخالفه .. مثلا ... كنت ماشي عالرصيف .. لقيت سيارة واقفة على معبر المشاة والسائق جوا ... المنظر مزعج جدا ... تقدم الشرطي باتجاه السائق ... وطلب الأوراق ... بكل ثقة وهدوء فتح السائق الشباك وناوله الأوراق ... تفحصهم الشرطي ...ورجعهم للسائق... وحكي معاه شي دقيقتين ومشيت السيارة والشرطي كانت ابتسامته ملى وجهه ...
- يعني .. شو .. الحضارة بالموقف ...
- الشرطي السوري راقي جدا ... لدرجه .. انو قابل السائق بابتسامه وودعه بحديث وابتسامه وما خالفه بالعكس حاول يوعيه .. وأنا متأكد أنو السائق بحياته ما رح ينسى هالموقف .... يعني الشرطي ... تجاوز القانون وتعامل بالانسانية ... والهدف السامي من القوانين هو الوصول للإنسانية ....
- الشرطي السوري .... ؟؟؟ طبعا .. انسانية .. ايه صحيح ... انسانية ...
خلصنا اللقاء ... وطلعت برا الشركة .. وأنا عم أمشي صرت أضحك بصوت عالي ... وأنا عم فكر بيني وبين حالي وعيد سرد الحكاية من جديد وأنو كيف هالشرطي السوري المعتر ... كان مبسوط وهو عم يودع السائق المخالف بعد ما اعطاه محاضره عن الوعي والانسانية .... شكله ستيف الكندي ما قدر يلقط الشرطي وهو عم يسحب عمولته من أوراق السائق ......... هههههههههههههههههههههه ... فلتحيا الإنسانية ..... هههههههههه ... الله محييك يا شرطي ... متل ما بيقولوا ... صيت غنى ولا صيت فقر ... ههههههههههههههههههههه

#لؤي_عجيب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات