امي والسفر

كامل الركابي
(Kamel Alrikaby)

الحوار المتمدن-العدد: 1113 - 2005 / 2 / 18 - 11:45
المحور: الادب والفن
    

أمي والسفر*
ياسفر
ﮔلب امي نجمه
ضَّوت الليل الطويل
ياسفر
ندمه إبتعدنه
وظل جرح بينه الرحيل
ياسفر
ﮔمرة وطنّه الغالي تبعد
والبيوت ابغير اهلنه
اشلون تسعد ؟
نهر وشراعك دليل
ونجمه
ﮔلب امي الحزين
ضوَّت الليل الطويل

ياسفر
ﮔلب امي شجره
يغفه عد فيها الحمام
وبيت من الطيب ﭽفها
وكل اغانيها سلام
بيها من الوحشه
دمعه
والدمع بالسهر
شمعه
تضوي ياعين التنام ؟
وشجره
ﮔلب امي الحنين
يغفه عد فيها الحمام

ياسفر
ﮔلب امي نهرين
وشموس
ﭽﺎنت ابطيبة نفسها
تحلم الروحي ابعروس
تضوي كل البيت
فرحه
وﮔلبي المالوم جرحه
ابظِل محبتها يبوس
الورد
بشفاف العروس

ياسفر
ﮔلب امي مثلك هم سفر
بس بالحنين
إنت من تزعل..مسافه
وهيَّ من تزعل ..تلين
ربي..خلها ابعافيه
شمس حلوه وصافيه
وأشجار تين
واطرد الشر
والمرض عنها
ابورود الياسمين

ياسفر
وجه امي أطيَّب
من وجه
أطيَّب حبيب
إتغيب شمس الله
وﮔلبها
إشموس
ماتفعل تغيب
أدري بيها إمجرّحه
وأدري بيها اهموم
ممتليه عذاب ومستحه
ياسفر
لاﭽن خذتني
الهجره لبعيد , السنين
لسه تذكر
بوسه
من تذكرها روحي
ابغربه
ﻴﺨﻨﮔني الحنين

ياسفر
ماتعرف اشموسي
محطات وحدود
باﭽر
اتصحِّي سمانه
وﮔمر
ع البصره نعود
انغني كل احلامنه
البيها طيب ايامنه
وطيب الورود
انبوس طﺒﮔتنه ونهرها
وتنكسر كل القيود

ياسفر
ﮔلب امي وهوَّس
ﮔلي هم ﮔﺎلت خذوه
يمّه
خافن ع النهر
ميِّت ﻟﮔوه
لو انذال الشارع
اتعدَّوا عليه وعذِّبوه
لومثل ماﮔلي مره
من اعلى طابق
عامل ابظلمه رموه
خايفه
وداعة حنيني
وشيبة الراس
العلى ارباته ضِّوت
ياسفر ل امي سلام
ﮔلها وعيون
اللي عالذِّل ماغفت
إﺒﻨﭻ الآخر محطه
شمس سمره
وماطفت !

*القصيدة غناها الفنان جعفر حسن

#كامل_الركابي (هاشتاغ)       Kamel_Alrikaby#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات