خلدون جاويد و كاترين

حيدر ابو حيدر

الحوار المتمدن-العدد: 3756 - 2012 / 6 / 12 - 08:32
المحور: الادب والفن
    

ساحاول ان انقل لمحبي الشاعر الجميل خلدون جاويد ما يدور بيننا من احاديث شبه يومية عبر الهاتف.. وسأكون امينا على نقلها كما هي فانا غير معني هنا بكتابة مقالة نقدية عن قصائدة او دواوينه الشعرية.. بقدر ما يهمني ان اقدم ملخص تلفونات تجري بيننا, لاعتقادي ان جميع محبيه و اصدقاءه يهمهم هذا الامر
نعم.. ان صديقنا خلدون جاويد يسكن الان في مركز العناية الخاصة .. ماهو هذا المركز ؟ وأين؟ هذا ما سنعرفه من خلال هذا التلفون....

- الووووووووووووووووووو
- هلا هلا هلا...هاي انت؟؟؟ ادري بيك... انت اكبر زنيكيطي
اتغط مثل الشبوط واتنطن مثل الشلك
- اشلونك ابو نوار ... مشتاقلك
- اشتاقتلك العافية
( وبعد التحية والسؤال عن احوالكم وطيب اوقاتكم).. سالته..
- شنو هاي الوعكة؟؟ بيها عليها...
- ( ضحك) اسكت وخليها سبع عمليات والثامنة بالشهر الثامن
ويكلك اغاتي انت.. ان الفقرة الاخيرة صاير عليها كلس
وهذا الكلس ميخلي العصب يتحرك براحته.. ومن يتحرك يدك
براسي ويلعب بيه جقه شبر..
- طيب .. ميكدرون ايشيلون الكلس؟
- يكدرون.. بس اني ما قبلت..
- ليش ماقبلت؟
- لان اخاف يرحون ايضربولي النخاع الشوكي.. واذا ضربولي النخاع.. احتمال ايأثر على الاجهزة
- يا اجهزه هذي؟؟
- ولك الاجهزه ارعن...
- اكعد عدل ارعن....
( ضحك)
- بالله هسه اليسمعك هم يصدك انت مريض؟
- لعد شأسوي ادك المقتل بمركز العناية..
المهم.. شخبارك؟ فعلا مشتاقلك..
- اني زوين.. يعني .. دارجه
- شخبار الاصدقاء..؟ اشلون فلان وفلان وفلان
( بالمناسبة سالني على الجميع)
- كلهم زينين والكل ايريد ايزورك بس ميعرفون مكانك بالضبط
- يا اخي اني حاطيني امكان كلش صعب ممنوع الزيارات.. وحتى
اولادي من يجون ايزوروني لازم يلبسون نايلون وكمامات..
جنهم رجالات الفضاء
- شنو صاير معدي؟؟
- وره حرف العين خلي ياء ..بعدين كل اثلث ساعات تجي وحده
اشحنتيه اسمها كاترين وياها ثلاثة, جنهن مدلكجيه بحمام الفضل,
ويكلبني على الصفحة اليسرى.. ونوبات ميكدرن ..فيجيبن اسلنك..
شايف الكرينات الي ايشيلون بيهن الحديد؟؟ بس انت وين شايف..
اصلا انت ماشايف بغداد ..واذا شايفها فحدك للنهضة تاكل كباب
وترجع للعمارة...يعني كسر بجمع صايره عندي بكتريا
- زين بس اني لازم اشوفك؟
- لا بابه مو هسه .. شنو انت ما رايد نفسك؟
- طيب انت تاخذ دوه .. لا....؟
- لك يوميه 29 حباية.. للفقرات.. وللالتهابات.. ونوبات انسى قسم
منهن...
- ليش تنسه..؟ وكاترين؟.. ليش هي متذكرك بالدوه؟
- كاترين ما مسؤولة عن الدوه.. هي بس على الحمام
- اضرب...
- لك لا ..ليروح بالك بعيد..حتى روحت الحمام تعذيب
- ( ضحك)
- اكلك شنو اخبار المسرح؟
- هسه عوفنه من المسرح بعدين من ازورك احجيلك
المهم انت.. شتقره شتكتب هليام؟
- القراءة.. قليلة لان اتعب بسرعة.. والشعر والفقرات اثنيناتهن
يوجعن..عندي جم رواية اتساله بيهن.. بس بدون بيرة
- يعني لازم بيرة؟
- الي ما يجرب البيرة وقراءة الرواية بان واحد خلي يكعد ابيتهم
ويبطل ثقافة وكتابات بالانترنت
- هسه يقرون جماعة الحكومة ويتهمونك بالزندقة والفحشاء
- ايباخ.. علااساس همه ميشربون..ابشرفك شايفلك حرامي ميشرب
- هاي شنو يعني احنه حرامية؟؟؟؟
- شفت افتهمتني غلط... سامع هاي النكته مال افتهمتني غلط
- يمكن سامعها بس احجيها
- ايكلك اغاني انت, اكو فد واحد راد يتحرش ابوحده كلش حلوه
وجها مثل صحن الكيمر, اجه عليها وهي جانت تاكل ايس
كريم..كاللها اكلج عيني.. عندي طلب بس رجاءا لا تفهميني غلط..
كالتله لا اتفضل اطلب فكاللها بلكت تنطيني لحسه..فهي شالت
الايس كريم وقدمته اله.. فجان ايكلها.. شفتي فهمتيني غلط..
- ( ضحك)
- زين .. شنو قصدك هسه؟؟
- اسال حكومتك؟؟ ليش تسألني
- المهم ابو نوار اني قريت بالمواقع اللاليكترونية اكثر من واحد كاتب
عنك..... شفتها؟؟
- اي فعلا اكو اكثر من واحد كاتب عني واني لا طالب منه ولا هم يحزنون اشو هذا حاط ايات قرأنية ويطلب من الناس تدعو لي بالشفاء.. زين انعم لله.. بس مال يطلب من الحكومة اتساعدني.. هاي اشلون.. ؟ منو كالك اني اريد مساعدة من الحكومة ؟؟ زين انت غير تسال؟.. لو اتريد اتسوي على اساس سبق صحفي ... لك بابا كلشي ما اريد من هاي الحكومة غير بس اتعدل نفسها كبل مايوكع الفاس بالراس..... حيدر وين صرت؟
- اسمعك اسمعك ابو نوار

- البارحة قريت شي منشور لرئيس الكومنترن
- منو هذا؟
- شعليك منو... دور بالكوكل وانت تعرفه..
فد لحظة اجت كاترين..
- سلملي عليها...
طوط طوط طوط طوط طوط......
انقطع الخط... يبدو ان الوقت قد حان لقلب صديقي الى الجنب الايمن........


يتبع......................

#حيدر_ابو_حيدر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات