الاخوان والوطنى تانى!!

لبنى حسن

الحوار المتمدن-العدد: 3738 - 2012 / 5 / 25 - 12:33
المحور: اليسار , الديمقراطية والعلمانية في مصر والسودان
    

رجعنا تانى للمربع صفر بس بخساير لا حصر لها...

رجعنا تانى للعب الوطنى مع الاخوان بكل تدنى مستواهم من رشاوى و أكل و إشاعات واستغلال فقر و جهل الناس لشراء أصوات...نفس الاخلاق القذرة و نفس الدور "السياسي القذر للكنيسة" اللى حاول يقاومه بعض المسيحيين خاصة من فئة الشباب بس عموما تأثير المسيحيين ككتلة تصويتية اصلا لا يذكر و ده ثابت من نتائج تصويتات سابقة فى مجلس الشعب و الاستفتاء على الدستور لكن أكيد موقف غير محترم و غير مبرر لأن كان فيه خيارات فيها شرف..كأن دم مينا دانيال و شهداء ماسبيرو ده كان نتيجة خناقة فى فرن بلدى!

رجعنا تانى للكدابين و المتاجرين بالدين والحرامية و مراكز القوى و النفوذ بعد ما الجهل و الفقر و الأمية لعبوا دور البطولة و بعد ما حزب الكنبة دخلت عليه لعبة الفوضى و الأمن اللى بتتلعب بعد كل ثورة فى كل بقاع العالم بس أمه اقرأ لا تقرأ التاريخ و لاترى أبعد من طرف أنفها... رجعنا لنقطة الصفر او ما قبلها لان لجنة الانتخابات اساسا و مهما كان تحفظنا عليها فهي فى الأصل لا تملك قانون قوى يمكنها من ضمانة السيطرة على المال السياسى وماقدرتش تعمل حاجة لمرشحى الفلول و الاسلاميين اللى كسروا حاجز الحد الاقصى للصرف على الانتخابات و لا حتى استطاعت اجبارهم على الافصاح عن مصدر الأموال و هل هى خارجية ام مسروقة لان مافيش مصدر تالت نتيجته تكون مقتربة من النص مليار جنية و فوق قدرة اى فرد دفع ما بين خمسين لمائتين جنية فى الصوت ده غير الأكل و النقل والاعلانات اللى من غيرهم ما كانش مؤيدى التيارين - رغم أننا لا ننكر أنهم ملايين- وصلوا لتلك النتائج...و يمكن كمان التيارين أفادوا بعض لان البعض اختار الأخوان خوفا من عودة الحزب الوطنى و البعض فضل نار الوطنى عن غياهب تخلف جماعة تلعب بالدين فتغش وتكذب و تنقض العهود و تتحالف مع الشيطان لمصالحها و ميكافيليتها...

فيه محافظات عملت اللى عليها و وقفوا وقفة رجالة من خمسة و عشرين يناير للأن و فيه محافظات أثبت أن مافيش فايدة دى جينات أو ربما ابتلاء!

مع كامل احترامى لثورية خالد على و لنضال ابو العز الحريرى و شرف البسطويسى بس الأنانية ضيعت الكل و كل واحد فيكم كان واثق مليون المائة انه مستحيل يدخل اعادة حتى انما داخل فقط يفتت أصوات و يستغل فرصة الظهور فى التلفزيون في وقت البلد فيه فى مفترق طرق و على وش خطر قندهار او فساد السيجار!
و برضة مع احترامى لكل مصرى سلبي او صاحب موقف و مش واثق فى العسكر و قرر يقاطع و دول خمسين بالمائة من الناخبيين بس للاسف انتم كنتم شوكة فى ظهر الشباب لأنكم لا اسلاميين و لا حزب وطنى ولكن قدمتوا ليهم أكبر هدية بقعدتكم فى البيت لأن أكيد أصواتكم كانت ح تبقى ضدهم و كان الأفضل تتعاملوا مع ما هو متاح مش مع ما هو خيالى و مثالى و الإ بلاش و نسيبها تغرق...

مش حقيقى ان حمدين و أبو الفتوح ضروا بعض لان أصوات حمدين كانت بينه و بين الفلول و أصوات ابو الفتوح كتلتها الاساسية كانت ح تروح لمرسى...

سنة و نص راح فيها دم كتير و اتقهرت أمهات و زوجات و ابناء و اتحمل فيها شباب ظلم و تعذيب و اعتقالات و إنهاك بدنى و نفسى و عصبي و البلد استنزفت ماديا و أمنيا و فى النهاية المحصلة الواقعية صفر او يمكن أقل لان الحرامية مش بس ح يخرجوا دول ح يزيدوا و يتشجعوا و يتبجحوا و رجعنا لنقطة البداية.. طيب كل ده كان ليه ما كان مبارك منورنا!!

#لبنى_حسن (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات