الأخ إسماعيل هَنِيّة (أبو العَبد) ..!!

أكرم الصوراني

الحوار المتمدن-العدد: 3671 - 2012 / 3 / 18 - 16:50
المحور: مواضيع وابحاث سياسية
    

".. أبو العبد .. اعزمني ع العَشـا ، حتى ولو ع ساندويتش زيت و زعتر .. بركي تفهِّمنِي .. تِقنعني .. حاكم أنا مُخِّـي سميك ..!!"

قد يسأل البعض لماذا أطلب العزومة ، ولماذا أبو العبد ..؟ وأقول لكم ، والله لا أطلبها طفاسه ولكن حتى أفهم طبيخ السّاسة ومقادير السياسة ..!! وأمّا لماذا الأخ أبو العبد وليس الأخ أبو مازن ، فبكل بساطة لأنني أولاً مواطن فلسطيني مسكونٌ بـ غـزّة ، وثانياً كون الحصار والاحتلال والانقسام والحواجز والمكانس تَحولُ دون زيارتي الضفّة ، اللهمّ إلا إذا أرسل لي الأخ الرئيس طائرته الخاصة فسألبي الدعوة فوراً .. وثالثاً والأهم أنني أود "الدردشة" مع أبو العبد حول خبرٍ قرأته ، وأنا ضعيفٌ بالقراءة ، ولا أتقن فنّ مهارة الجزيرة في تحوير الأخبار وتفسيرها وفتنتها وتوظيفها لحساب الناتو وضرب سوريا بلا حـدود ..!!
والمبتدأ أخ أبو العبد أن هذه الرسالة آمل أن تصلكم وأنتم بالصحّة والعافية ، والخبر أنِّي قرأتُ تصريحاً لكم تشددون فيه على وحدة الأرض والشعب والقضية .. و بدّيش أعيد الحكي ، واعذُر عاميّتي وقلّة فُصحَتي ، نصُ الخَبرِ يقول وجُلّه كلامٌ معقول .. " .. شدد إسماعيل هنية رئيس حكومة غزّة على وحدة الأرض ووحدة الشعب ووحدة الهدف ، داعياً القيادات الفلسطينية لزيارة قطاع غزّة .. " وقد جاء ذلك خلال ترحيبكم بكلٍ من المهندس عماد العلمي عضو المكتب السياسي لحركة حماس العائد إلى غزّة ، ود.ماهر الطاهر عضو المكتب السياسي للجبهة الشعبية الذي زارها وغادرها قبل أيام ، طبعاً في الخبر يقولون أنك عزمت الإخوان على مأدبة غداء أقمتها على شرفهم ، وصاحبُك المواطن طمعان بكرمك وعشوة على ما قُسِـم ..!
المهم أنّك أخ أبو العبد -كما تحب أن نخاطبك- فأنت الذي قلت للأمانة أنك لا تحب ألقابَ المعالي والفخامة ، وحسبما نما إلى علمي ، وسمعتك يوماً تقولها ، أن (أخ أبو العبد) هي الأحب إلى قلبك ، فاعذرني إن حادثتك بأخوية دونما ألقاب وحواجز .. المهم مرة ثانية ، وحسبما يضيف الخبر موضوع الرسالة ، جاء على لسانك ".. إن هذا الحفل يحمل دلالات عدة أولها وحدة الأرض ، ففلسطين واحدة كاملة .. أما الدلالة الثانية فهي وحدة الشعب الفلسطيني في كل مكان ، بالتالي الاحتلال والجغرافيا لا يمكن أن تقسّم هذا الشعب ..!!"
أتفق معك فيما ذهبت إليه ، وخصوصاً جملتك الأخيرة أنّ " .. الاحتلال والجغرافيا لا يمكن أن تقسّم هذا الشعب .." .. لكن ، أَفهَـم من الكلام / الحكي إنّـو إحنا ممكن نقسّـم بايدينا ، ولاّ قسّمنا وأكلنا وشبعنا .. وصحتين للبلدين .. وصَحّة للوطـن إذا "اتشردق" ..!!
ثم تقول أخ أبو العبد " .. نحن الشعب الفلسطيني نسير نحو إقامة الدولة بمختلف الطرق .."، وأوضحت ".. أن رسالة اللقاء تقول أن حق العودة لفلسطين حق مقدس لا يمكن العودة عنه ، وأن عودة القيادات وغيرهم إلى غزّة كجزء من فلسطين هو حق طبيعي .." . طيّب ، مش بس ترجع غزّة لحضن رام الله بالأول ..! ويرجعوا التنتين لحضن البلد ، واللي فاضل من الوطن ، وبعدين بنحكي بالعودة ، وإذا بتحب بنحكي بالتفاصيل بعد العشـوة .. بنقعد ع فنجان قهوة ، زي ناس كتير قعدُوا ونسيوا يقوموا لاقوها نسكافيه ..!! مع أنّي أُحبِّذ كوب شاي أخضر ، مِنّـو بنحرق دهون ، و مِنّـو بنهضّم ، وبيصير بيننا عيش وسردين ، خصوصاً اذا بتعملي سمك ، محسوبك يفضله مقلي مشوي مش فارقه ، المهم ما تكون العشوة زي وضعنا ، سمك لبن تمر هندي ، وأَروِّح بعدها بتلبك معوي ، وتلبك في التفكير والتحليل ، و يعني بدل التلبّك اتنين ، والحكومة حكومتين ، والبلد نُصّين ، ومش حجيبلك سيرة التموين والبنزين ، ولا نقابة الصحفيين .. هادا اذا وصلتك رسالتي طبعـاً ..!!
طيّـب ، خلينا ننسى السّمك والصيَّدية ، وع جنب نحُط الصينية ، وكذبة الشرعية ، وكذبة نيسان ونرجع للخبر حتى يفرجها صاحب الزمان .. تطرقت يا عزيزي إلى ما تعانيه القدس وقلت أنّ ".. هموم غزّة وما تعانيه تبقى بسيطة أمام الهم الأكبر الذي تعانيه القدس .." يعني بجد هاي من الأشياء اللي حابب اتفهمني إياها .. خاصة وأنك " .. جددت الالتزام والجدية بتحقيق المصالحة الفلسطينية وإنهاء الانقسام الفلسطيني الاضطراري ، وأشرت إلى أنّ المصالحة ليست خيار إنما هي واجب سياسي ووطني وأخلاقي .." أخ أبو العبد .. من البداية قُلتلّك مُخّي سميك ، يعني انقسام اضطراري ..! والتزام بالمصالحة ..! وليست خيار ، مع إنِّي شايفها فقّـوس .. بس مش عارف ، يمكن فيه مصالحة سرّية وانا مش عارف ..!! إذا شفتك بنحكي ، ع الأقل بدّك تفهّمنـِي .. ومش مروّح غير لمن أفهــم ..!!
بعدين غيّرت رأيي بالنسبة للعزومة .. انسيت إنِّي مش قيادي ، لأ ، وبَطلُب سمك كمان ..!! يعني مُواطن وبـيتشرّط ..!! عموماً باعتباري مواطن ، والمواطنين شكلهم سايبينها ع الله ، وأي حاجة معهم بتمشي ، فبكفيني علبة تونه وشرحة لمونة وقرن فلفل مع إنّو معدتي والله يابو العبد خربانه ، بس كرمال عيونك تكرم مرج عيون ولو بدها اتدمّع ع السلطة ، قصدي من الشطّة ..!! المهم بدناش الشكل يطغى ع المضمون ، والتونه ريحتها تطغى ع التصريح وخلينا نرجع كمان مرَّة للخبـر ، الذي يضيف أنكم اعتبرتم اللقاء بالمعزومين ، أخونا الأخ م.عماد ، وأخونا الرفيق د.ماهر " .. عرس وطني ، كونه يضم كل الفصائل والفعاليات بلا استثناء .." وهذا ما لا تنتطح فيه عنزتان .. معاك ع الخط وإنّو عرس ، لكنك أشرت إلى أن " .. غزّة رغم أنها محاصرة إلا أنها حرّة في داخلها وإرادتها وفي قراراها ، ولا يمكن أن يكون لأحد سلطان على إنسان فلسطيني بالعودة لغزّة ، داعياً كل القيادات الفلسطينية والأهالي بزيارتها لأنها ستكون بداية العودة .." الصحيح وتزعلش منّي أنا شايفها بداية الخيبـة ..!!
أخ أبو العبد ، في حال وصلتك الرسالة فهذا ايميلي الخاص [email protected] ، والجوّال انت عارف لدواعي شخصية مش راح أكتبه ، بعدين جوّال منك ، قصدي تليفون بتجيبني ، قصدي بتعزمني وبنحكي ، طبعاً عارف إنَّك مشغول وربنا يكون بالعون فإذا لم تهاتفني سأظل أتابع أخبارك ، وتصريحاتك ، ومصير المصالحة ولقاء الأخ أبو مروان بالأخ أبو وائل ، وأبو عبد الله بأبو جهاد ، وأبو محمد بأبو أسعد ، وأبو ليلى وأبو سلوى وأبو واصل وأبو قاطع وأبو شريف وأبو عفيف وأبو خالد وأبو البراء وأبو نداء وأبو خليل واستكمال الحوار بعد التعديل وكل الأبَّوات تمهيداً وتحضيراً للقاء القمَّة الذي يجمع الأخ أبو مازن بالأخ أبو الوليد .. وآااخ يابو العبد .. عـارف ، مش حاكي معك بالماضي ، ولو إنّو اللي فات ما مات .. ومش حاكي بالمستقبل ، وطبيعة العلاقة مع مصر ، وقطر العظمى بالشماغ و بالتواطؤ ، وصبغة لحى مشيخات مكّة الأجنبية والقواعد الأمريكية ، والخذلان العربي والإخوان واتصالات المرشد العام بالكون و بـجون وبواشنطن والمصالح المشتركة ، والنظام الأردني ودور المخابرات ، وبيت أبو سفيان ، والخلاف الخلاق في حماس وكلام الناس ، وحواديت الراكب والمراكب والصيادين والسّواقين ، والمعاناة والفاقه وسلطة الطاقة ، والثرثرة فوق بلدية غزّة ، وهمسات التذمر والعتب ، والشعب اللي راح ضَحيَة و تِعِب ، وسيرة أبو لهب ، وتبييض الأموال وأثرياء غـزّة الجُدد ، وولاية الفقيه وإيران ، وانتفاضة البحرين ، والسنة والشيعة والوتر والفرض ، ولماذا تركوا الحسين وحيداً وبايعوا يزيد ، والإسلام السياسي والاقتصادي والكيميائي ، والأيديولوجيا ، ودور القرضاوي الوظيفي ، وطابور الخريجين وشُح الوظائف وتوظيف الدين ، والهدنة واستحقاقات الحكم ، والثابت الوحيد في السياسة المتغيِّر ، ومعاشرة السلطة والمقاومة ، وسرير المفاوضات والأوهام ، وسبحان مغير الأحوال ، والانتخابات تحت الاحتلال وفوق مستوى الدوران ، والاختلال الذي أفقدنا جميعاً توازننا الوطني .. مين منَّا ضايل محافظ ع جاذبيته يابو العبد ..!؟
ع قولتك ، هي لله ..!؟ بيني وبينك ، مش عارف كيف لو كانت للعبد يابو العبد ..!! ، الله اللي بسترها ، المهم إنَّا متفقين أنَّ الدين لله والوطن للجميع ، والبطولات في غزّة ، الله وكيلك آخرها دوري الزيتون والشجاعية (25) / صفر ..!!
وعدتَّك ما نفتح الماضي ، ولا نبعط المستقبل ، وشكلو مش حيزبط ، شايفلك كُلُّه بينفِّد ع كله زي الأنفاق والمعابر ، والسولار من مصر مش عابر حتى بعد ثورة 25 ينايـر..!!
و حتّى ما أَدوِشَك زي دَوشِة المواتير والضرايب وحسابات الفواتير ، وأطوِّل عليك زي الكهربا اللي بتطوِّل لمّا تِجينـا خلينا باليوم وبالحاضر والحاصل ومين اللي أهم الوحدة الوطنية ولاّ وحدة الوطن ..؟ إذا مش عارفين لسّه مين أهم ، بيضل المهم إنو ما تكون آخريتنا وآخريتها تغريبة فلسطينية جديدة ، وإحنا بدناش تغريبة جديدة ، ولا زعيم من تمر .. بدناش قطعة رغيف ناشفة يغُتهـا الشعب بكاسة مرمرية ونضحك عليه و نقولُّه صَحّة وهنيّـه ..! بدنا محو أُميّة وطنية ، وبدنا علم واحد .. وطن واحد ، وحـارة وَحدَه وبـاب ، وحَـدا يحمي ويوحِّـد البـلاد ..!
أبو العبـد ، كلمني شُكـراً .. وإذا ما بدّك كلّم الاخوان وأبو مازن وأبو الوليد ، فما عُدنا نحتمل المزيد ، والشعب مازال يريـد إنهاء الانقسـام وبقيةٌ من أمـل ..!!

وخالص مودتي وسلاماتي للقيـادة ولا أراكم الله مكروهاً بالوطن ،






آذار/2012 أكرم الصورانـي
غزّة-فلسطين المحتلة

#أكرم_الصوراني (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات