سلام الله

حامد كعيد الجبوري

الحوار المتمدن-العدد: 3116 - 2010 / 9 / 5 - 19:02
المحور: الادب والفن
    

مهداة للحزب الشيوعي العراقي

سلام الله عليكم كبر الظنون
وعلى كد الفرح بعيون الأطفال
على كبر السمه والكاع والكون
على عد الورود وكثر الرمال
على الشالوا وطنهم بين العيون
وحرسوا وحدته الهوره والجبال
على الطشوا فكر طيبه يزرعون
وقدموا للعراق أجيال وأجيال
سلام الله على الشاخص يموتون
ويتعنه المنايه أبراحة البال
شيوعيين للصعبه يركبون
يروّض مهرته ويصعدها خيال
يحزم للفلح ساعة يغبشون
وحاصود السنابل شكبن وشال
يشد جاكوج ليده أويه اليدكون
وأيطك اللحام أبحيل عمال
يمد أبساط خوه لليضيفون
ويكص سجين زنده ويشبع إرجال
أشنظمولك شعر وأشما يكتبون
ما يوفون حكك قيد مثقال
بيضه رايته وحمره تشوفون
من دم الرفاق أبطعنة إنصال
لبناتي وأمهاتي ولليهنون
هلهلن يا خواتي بان الهلال
***
يبوا أجروح الجبيره أشما ينوجون
يسد باب العتب ويسامح العال
على كبر العراق وجرحك أيهون
ما هدك جرح وأشما كصه وطال
خلخال السلاسل من يقيدون
ومرجوحه المشانق لعبة أبطال
يكبر بالمنافي أشما يهجرون
ومن نبراس صبره كتبوا أمثال
ما يوكف إباب أويّه اليمدحون
ولا مجد صنم لا صار طبال
يروّيهم عذب كلما يعطشون
ويكرم ميته ويفرح بالوشال
يبو إيد النظيفه أشكد ينهبون
يسلبون الفقير وحملوا إجمال
متهمه الكراسي أشلون متكون
ولا يركض عليها وينسج آمال
البزايز حصته وغيره يصدرون
لا عارض القسمه ولا شكه الحال
ما تحتاج بيبانك يحرسون
لأن إنت الأبو وكل شعبك إعيال
***
أفك باب العتب وأتعاتب أشلون
وبيك أمن الجروح ألوان وأشكال
النوارس والبلابل ما يغنون
وكفت ع الشجر ممسوخه تمثال
باكوا ضحكة أهلك ما يفرحون
وجثث فوك الجثث من شعبك إتلال
مو ماي الفرات ودجله يجرون
على دم العراق أدموعهن سال
ترضه للعراق إيبات مرهون
مره للئيم ومره لنذال
يا فحل النخل منك يلكحون
ومن بستان رايك ترسوا إسلال
كليط الكوم من تحجي يسنطون
وتنظرلك أعيون وتكتب إشكال1
من نفضة عباته الكل يهابون
وألف أحساب تحسب وجهه لو مال
يبو الغيره الشهم غيرك يحشمون
وتنهضلك أسود وتنتخي أشبال2
بشيباتك يبو النخوه يباهون
يباري العيط 3 حيله ويشتل التال
من بيت الحزب (عادل) و (سعدون)
وحاديهم ( فهد ) هوسات (هندال)4
***

1 : ماذا قال
2 : أولاد الأسد
3 : النخلة الباسقة المعمرة
4 : قائد عمالي بصري شهيد

#حامد_كعيد_الجبوري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات