مسنجر بين الجنّة وجهنم-2

كامل علي

الحوار المتمدن-العدد: 3015 - 2010 / 5 / 26 - 00:41
المحور: كتابات ساخرة
    

في اليوم التالي تمّ اصلاح الخلل في الشبكة الكهربائية بجهود الزبانية وبالاستعانة بالمهندسين اليابانيين. في فترة الاستراحة اتّصل متعوس بصديقه محظوظ ودار بينهما المحادثة الثانية في المسنجر:
متعوس: اشلونك خوية محظوظ، هم زين لكَيتك، البارحة انكَطع الاتصال لان الكيبل الكهربائي احترك.
محظوظ: زين اشلون صلّحوه؟
متعوس:والله لو مو ياجوج وماجوج ما جان دبرّوها.
محظوظ: منو ذوله؟
متعوس: ليش مسامع بيهم ذوله اليابانيون والصينيون، كَبل جم يوم سوو اضراب عن الاكل وكَالوا احنا منكَدر نكّعد عطّال بطّال، احنا اذا منشتغل نموت من القهر.المسؤول الجبير يمنه فتح شعبة للخدمات الهندسية وعيّنهم كلهم بس بدون راتب.
محظوظ: لعد هومّه هم ديشرفون عل الانترنيت مو؟ صدك شنو اخبار اياد الزاملي؟ خلّوه يفتّح موقع كتابات من الجحيم، مثل مكَتلي البارحة؟
متعوس: اليابانيون ديشرفون عل الانترنيت من الناحية الفنيّة واياد الزاملي كّدر يفتح الموقع مالته وعيّنوه مسؤول عن الانترنيت كافي لانه عنده خوش خبرة بهلشغلات وبعدين الرجّال خوش انسان وميتدخل زايد.
محظوظ: بالنسبة لكَطعة القوّة جانت مدبّرة لو صدفة؟
متعوس: لا صدفة، خوماراح تكّوللي همّين شغلة ابو ناجي؟
محظوظ: لا، اني عبالي الزبانية كَطعوا الخط لان حجينه زايد البارحة مو؟
متعوس: ليش اكو رقابة عل الانترنيت اهنا؟
محظوظ: طبعا اكو. ليش متدري؟ كلشي اللي نكتبه يقرو اهنا خو مو خان جغان.
متعوس: خللي يقرون شي يسوون قابل، المبلل ميخاف من المطر.
محظوظ: هاي بالنسبة الك، بالنسبة الي يكَدرون يطردوني من الجنّة ويجيبوني يمّك.
متعوس: هاي ما فكّرت بيها، خللي منروح زايد بالحجي، على الاقل واحد عراقي وصاحبي يببقى يتنعم بالجنّة.
محظوظ: صدك احجيلي عن الكَبر وعذاب الكَبر اشسوولك اهناك؟
متعوس: يابه هاي فد طلابه ليشوفه الله لحّد. خللي احجيلك، ورا مدفنوني، هجم عليّه النمل والدود وانواع الحشرات، ما خللوا بجسمي مجان صاغ سليم. بعد شهر من الوليمة اجه يمّي زوج من الملائكة، واحد اسمه ناكر واللاخ اسمه نكير، وكَاموا يسئلوني اسئلة بلسان عربي فصيح: من ربّك؟ ومن نبيّك؟ وما كتابك؟ وما قبلتك؟
اني جنت اعرف راح يسئلوني هل الاسئلة وجنت دارخ الاجوبة درخ، بس تدري اني بالامتحانات ارتبك وانسى المعلومات اللي درختها فمكَدرت اجاوب صح، بعدين مديت ايدي حتّى اطلّع وركَة مال القوبية اللي جنت موصّي اهلي يخبوها بجيب الكفن لكَيت الوركَة صايرة وصلة وصلة، اثاري النمل والدود ماكلين منها.
محظوظ: بعدين اشصار؟
متعوس: انلاصت عليَّ وما كَدرت اجاوب على كل الاسئلة، بس كَدرت اجاوب على السؤال الاول وكتللهم ربي هو الله سبحانه وتعالى. الملكان كَللولي انت رسبت بالامتحان لان لازم تجاوب على كل الاسئلة يللا تكَدر تنجح بالامتحان، كَتللهم زين ماكو ترك؟ احنه بلعراق منجاوب على كل الاسئلة، اكو دائما ترك بالاسئلة.
محظوظ: اي بعدين شصار؟
متعوس: ورا ما رسبت بالامتحان عذّبوني فد تعذيب ولا تعذيب جماعتنا الامن العامّة، بعدين عافوني وطاروا. ورا اشويّة اشوف الحيطان مال الكَبر تحركت وكَامت تعصرني مثل المنكَنة، بقيت على هلحال الى يوم المحاكمة، اقصد يوم الحساب.
محظوظ: والله وضعيتك متنراد، كَلبي عليك متعوس.
متعوس: كللي هم سئلوك نفس الاسئلة؟
محظوظ: طبعا،لكن اني جاوبت على الاسئلة مية بالمية، بعدين كَللولي: بارك الله فيك وطاروا.
متعوس: بعدين اشصار؟
محظوظ: ورا ماراحوا الجماعة الكَبر صار مثل النهار ضويّة والحيطان مال الكَبر كَامت تزحف ليغاد. على كل حايط شفت شاشة مثل شاشة التلفزيون وفرّجوني مناظر من الجنّة وافلام هنديّة مال شامي كابور وافلام اجنبية ومسلسلات اشكال ارناك وبقيت على هلحال الى يوم الحساب.
متعوس: والله فرحتلك خوية محظوظ ولو يكَولون ماكو احد يفرح بالجحيم. خللي اضحكك اشويّة، ورا مدفننوني بجم يوم، دفنوا يم كَبري واحد كاكا، بعدين جوي هيكل جيكل...اقصد ناكر ونكير، اني جنت اسمع حسهم من سالوا الاسئلة المعهودة وبلسان عربي فصيح وكلما يسالون الكاكا ميجاوب، بعدين ورا مالحّوا زايد الحاحا واصرّوا زايد اصرارا على كَولة عادل امام كَال الكاكة بالكردي: اني ميعرف عربي وكلشي ماافتهمت من هلحجي المفروض تجيبون ويّاكم فد مترجم تعرف لغات، اني دخت وزجت فلتدوّخوني زايد، روحي انتِ جيبي كلاشات مال اني، اني اريد اروح جهنم وبئس المصير.
محظوظ: ها...ها...ها هاي هم نكتة من تاليفك مو؟
متعوس: يانكتة، وداعتك صدك، الرجّال مو حقّه ميعرف عربي وخطيته بركَبة كاك مسعود ومام جلال لانّو سووا الدراسة كلله بالكردي في شمال العراق.
محظوظ: هاي مجنت مفكّر بيها، صدك ذوله اخواننا التركمان والاثوريون والقوميات الاخرى مثل الالمان والانكَيليز اشلون يجاوبون على هل اسئلة؟
متعوس: والله ما ادري، خللي احجيلك اشصار يوم المحكمة.... اقصد يوم الحساب.
محظوظ: اي بالله احجيلي.
متعوس: يوم الحشر صارت هوسة، مليارات من البشر... لو اكَولك جان يطلعون فد ثلاميت مليار مو جذب. الكل جانوا يتراكضون يمنه ويسره عبالك سكرانين ومرعوبين، بعدين جوي المسؤولين وكَفونه سرة، اشلون سرة، يطلع طوله فد مليون كيلومتر، اني ردت اضرب السرة واطلع ليكَدّام، بعدين خفت،كَلت خللي اشوف اشراح يصير للواكَفين بالمقدّمة بعدين قابل هيّ سرة مال اللحم لو مال بيض بالسوق المركزي لو سرة مال البان ايام المرحوم والحصار. بعدين تذكّرت ذيج الايام الغبرة واشلون وكَفت سرة اربع ساعات في الجمعيّة التعاونية مال راغبة خاتون علمود كيلوين بيذنجان وكيلو فلفل من صارت دولة الكويت المحافظة التاسعة عشر، الله لا يرجّع ذيج الايام. بعدين تذكّرت ايام الدراسة من جان مدرّس النصوص ينطينا واجب حفظ قصيدة من عشرين بيت. اني جنت دوم ادعي لابويه لان اسمي يبدي بحرف الميم لان اول واحد يساله المدرّس جان اسمه يبدي بحرف الالف فجنت استغل الفرصة واراجع القصيدة الى ان يجيني السرة.
محظوظ: وبعدين؟
متعوس: اجاني السرة بعد جم سنة واحنه واكفين لان ممنوع واحد يكَعد بالسرة.
محظوظ: زين اكل اشلون ماجعت؟
متعوس: طبعا جعت، بس هاي هم حالّيها، اكو جماعة من الزبانية واكَفين يم السرة وجانوا يبيعون لفّات مال لبلبي ولفات مال عنبة وصمّون واشكال جرزات، خطيّة ذوله هم على باب الله وعدهم عوائل وكومة جهال.
محظوظ: زين ورا ماجاك السرة اشصار؟
متعوس: طببونا فد قاعة كلش جبيرة بيها قفص مال اتهام، بعدين اجه واحد من الملائكة بيده دريل، سوّه زرف بجتفي الايمن وزرف بجتفي الايسر، بعد شويّة طلع من الزرفين ملكان كل واحد لازم بيده فد سي دي (CD) مال كومبيوتر، من هاي اللي يسجّلون عليه معلومات وحسب ما سمعت من واحد بالقاعة انو يستوعب مليار جيكابايت من المعلومات والاعمال الحسنة اوالذنوب، بس اللي ما افتهمت ذوله الملائكة اللي جانوا خاتلين بجتفي وجانوا يكتبون تقارير سريّة اشلون عاشوا بهلمجان الصغيّر ستّين سنة،مو ذوله هم يحتاجولهم كومبيوتر وميز واكل مو؟
محظوظ: والله اني هم ماادري بس خصم حجيك انو ماكو كتاب بيمينك او شمالك مثل ماكال الامام بالخطبة.
متعوس:لا يابا لا، هذا الحجي مال كَبل، هسّة كلشي تكنولوجيك.
محظوظ: وبعدين؟ داحجي مو شلعت كَلبي.
متعوس:اكو فد ميزان الكتروني حسّاس كلّش يم قفص الاتهام كل واحد من ذوله الملائكة خلّه (سي دي) اللي شايله بجفّة الميزان بعدين شفت انّو الجفّة مالت السيئات نزلت اشويّة ذيج اللحظة كَلبي وكَع فكَلت بنفسي: ثكلتك امّك يامتعوس.
محظوظ:اللي افتهمتَ من حجيك انّو حسناتك طلعت بكَد سيئاتك لكن الفرق قليل يعني تكَدر تكَول انّو جفّة الذنوب طلعت اثكَل بكَد مثقال حبّة خردل مو؟.
متعوس: مثل ما كَلت بالضبط وهاي الفرق البسيط بسبب البزّونة اللي عذبتها، متتذكر شحجيتلك البارحة؟
محظوظ: اي تذكرت.كَللي اكو شهود بالمحكمة؟
متعوس: طبعا اكو شهود بس مو بشر.
محظوظ: لعد شنو حيوانات؟
متعوس: ها ها ها....لا يابا لا، الشاهد الاول جان جلدي والثاني عيوني والثالث اذاني، خصم الحجي كل اعضاء جسمي شهدوا عليّ.
محظوظ: زين اكو محامي لو اشلون؟
متعوس: لا ماكو محامي بس اني خلوني ادافع عن نفسي.
محظوظ: اشكَلت بالدفاع مالتك؟
متعوس: كَلت اني ماعندي صوج لان كل ما سويّته بالدنيا جان مكتوب بكَصتي واني حاولت اهوايه اغيّر المكتوب ولكن عبثا.
محظوظ: حلوة مال عبثا،صاير مثقف خوية متعوس، زين بعدين اشصار؟
متعوس: بعدين كَادوني الملائكة وكَللولي اعبر عل الصراط، واني من ده اعبر ما انتبهت اثاري اكو طسّة اصطناعية تعثرت بيها ووكَعت الى اسفل السافلين.هسّة احجيلي اشصار يمكم؟
محظوظ: اني هم نفس الشي بس الدريل ما وجعني لانّو جان يزرف باستعمال اشعة الليزر .
متعوس: هسّة احجيلي عل الجنّة وريّح اعصابي شويّة لان سمعت فد اشاعة قويّة اهنا يكَولون راح يطلع عفو وراح يجيبون قسم من عدنه يمكم.
محظوظ: مثل ما حجيتلك البارحة، انطونا بيوت من جام، هلبيوت بيها غرفة مال خطّار وغرف مال نوم مؤثثة وحمّام وبوري يطلع منّه مي وبوري يطلع منّه عسل وبوري يطلع منّه لبن وبوري يطلع منّه عرك وانواع الخمور كل نوع اله دكَمه خاصّة.
متعوس: كَوللي اكو مراحيض لو لا؟
محظوظ: ها ها ها... غير دماغسز انت، اشلون يصير مراحيض بالجنّة؟
متعوس: لعد اشلون، منتحصر وين تروح؟
محظوظ: بابا اهنا ماكو هلسالفة لان الاكل اللي ناكله ينهضم كلله وميبقى فضلات، افتهمت؟
متعوس: زين هلبيوت ايجار لو مُلكْ، اقصد انطوك طابو؟
محظوظ: طبعا مُلكْ بس البيع والشره ممنوع.
متعوس: خويه متنطيني وصف مفصّل عن الجنّة؟
محظوظ: حسب ما سمعت من المسؤولين اهنا انّوالجنّة الها ثمانية ابواب وكل باب مال الجنّة اله فد اسم، والجنة كلها مو سوة، يعني بيها درجات، اعلى درجة ديسموه الفردوس الاعلى ومنّاك تطلع اربع انهار، نهر مال ماي ونهر مال لبن ونهر مال عسل ونهر مال عرك.
متعوس: زين جم درجة اكو وانت شنو درجتك؟ مؤيّد لو نصير لو رفيق اشو تاهت عليّ الحسبة.
محظوظ: لتذكّرني بذيج الايّام فدوه اروحلك. الدرجات اهنا ميت درجة وانكَس واحد بينه عنده مُلكْ اكثر من مُلكْ مال اكبر زنكَين بالعالم بعشر قوط وهاي الدرجة اللي اني حصلّتها.
متعوس: زين نوعية الاكل اشلونه؟
محظوظ: الاكل كلش زين، اكو لحم مال هوش وغنم ولحم مال طيور اشكال ارناك، وطبعا لا تنسى الميوة اكو فد مليون شكل.
متعوس: زين احجيلي عل الاشجار اللي يمكم.
محظوظ: الاشجار مالتنه سيقان مالتها امن الذهب والوركَة امن الزمرّد الاخضر وكل شجرة الها اسم، مثلا اكو فد شجرة عجيبة اسمها طوبى وتشبه شجرة الجوز، هاي الشجرة جبيرة كلّش ومن الثمر مالتها تطلع ملابس من السندس والاستبرق.
متعوس: هم بديت تحجي الغاز، شنو سندس؟ شنو استبرق اشو كلشي ماافتهمت.
محظوظ: شسويلك اذا معلوماتك قليلة، بابا السندس معناته الحرير الخفيف وهاي نلبسه بالصيف، والاستبرق معناته الحرير الثخين وهاي نلبسه بالشتا.
متعوس: ليش هم اكو اهناك صيف وعجاج؟
محظوظ: بابا اهنا الصيف غير شكل، بعدين منين يجي العجاج، اهنا ماكو شي اسمه تراب.
متعوس: لعد يم الشط...اقصد بالكورنيش شكو مد كَوللي؟
محظوظ: صبرك يا رب، بابا اهنا الكَيعان كلله لؤلؤ وزمرّد. ها نسيت اكَوللك هاي الشجرة الها فد وظيفة غريبة.
متعوس: نورني اخويه محظوظ.
محظوظ: من نجتمع يم الشجرة ونتذكّر الونسة مال الدنيا مثل اللعب والطرب والركَص ونتمناها هاي الشجرة تطلع منها هاي الشغلات.
متعوس: لعد اشلون كَتلي البارحة ماكو اغاني وماكو ركَص بالجنّة؟
محظوظ: مو اني هل يوم اكتشفت هلسالفة.
متعوس: كَوللي محظوظ انت من متت جان عمرك ستّين سنة، هسّة انت اشكَد عمرك؟
محظوظ: اني عمري بالجنّة ثلاث وثلاثين سنة وبجسمي ماكو ولا شعرة، اعني امرد وطولي ستون ذراعا وشكلي حلو مثل يوسف ابن يعقوب. اكو فد شغلة محجيتلك عليه،الغيم اهنا تمطر حوريات حسب متريد.
متعوس: خوش حجي، زين الولدان المخلّدون شنو؟ وشنو محلهم من الاعراب؟
محظوظ: ذوله خزمتجية بس صغار بالعمر، يجيبولنه اكل وشرب وشكلهم حلو عبالك لؤلؤ.
متعوس: صدك نسيت اسالك، من جنّا لازمين سرة بباب المحكمة، شفت جماعة من طلعوا من القاعة ما ودّوهم للجنّة ولا للنار شنو ذولة؟
محظوظ: ذوله ناس اعمالهم السيئة والحسنة طالع متساوي ميّة بالميّة وهاي حالة خاصّة.
متعوس: زين ذوله شنو مصيرهم؟
محظوظ: اكو فد منطقة عالية بين الجنّة وجهنّم ديسمّوا الاعراف، هل جوكَة ينتظرون اهناك ويباوعون على اللي يدخلون الجنّة والنار وينتظرون.
متعوس: شينتظرون مدكَوللي؟
محظوظ: ينتظرون الرحمة، فاللي يجيله رحمة يروح للجنّة، واللي ميجيله يجيبوه يمكم.
متعوس: صدك نسيت احجيلك، اكو واحد جان واكَف كَدّامي بالسرة كَبل منطب بالمحكمة من اكلة لحوم البشر، من ذولة جماعة الامزون القدامى كلَش، سالته: اكو صلاة؟ اكو صوم؟ اكو زكاة؟ اكو حج؟ اكو جهاد؟ خطيّة باوع عليّة مثل الاطرش بالزفّة وكَال: باندوكا لاندوكا تام توم. طبعا اني كلشي ما افتهمت.
محظوظ: النتيجة؟
متعوس: سالت واحد من الزبانية اللي يحرسون السرة وجان يعرف لغات ومبيّن عليه مثقّف، كَتله اشكَال صاحبنا؟ كَللي ديكَول كلشي ماافتهمت من حجيك.كَتله للزبانية بداعتك حجّي انت اساله نفس السؤال وسوّي ترجمة، فمن ساله كايل الافندي: بزماننا مجان اكو هيجي عبادات.
محظوظ: خطيّة هذا لان مو صوجة اذا ماسامع هل شغلات.
متعوس: البارحة ورا ما انكَطع الكهرباء يمنه، شفت مام جلال وكاك مسعود مسّوين اجتماع ويّه عبدالعزيز الحكيم وجلال الصغير، وسمعت يريدون تقسيم جهنّم الى دويلات.
محظوظ: حتّى اهناك؟ ذوله مايصير براسهم خير. زين الزبانية من سمعوا بالسالفة شسوولهم؟
متعوس: لزموهم وخلّوهم بالسجن الانفرادي، بعدين واحد عتوي من الزبانية بيده دريل سوّه زرف براس كل واحد من ذوله وجب بالزرف حديد مايع ديسمّوه اهنا الحميم، تدري اشصار بيهم؟
محظوظ: اشصار؟
متعوس: المصارين مالتهم طلعت من جوه وكَاموا يصيّحون: توبة هلنوبة، احنه ويّه فكرة الجهنم الموحّد ونريد حكم مركزي.
محظوظ: متعوس كَللي وين تنامون، عدكم بيوت مُلكْ؟
متعوس: اهنا ماكو لا بيوت ولا مُلكْ ولا قزلقرط، وين متريد تحترك انت حر.

ذيج اللحظة ساد الهرج والمرج في الانترنت كافي لان عبدالعزيز الحكيم تكاون ويّه مقتدى الصدر،ّ اياد الزاملي مسؤول مكب النفايات طفّى الكهرباء حتّى ينهي العاركة، وجوّي الزبانية وطلّعوا الكل برّه بالجلاليق.

#كامل_علي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات