خلط الأوراق .... عند خلف الدواح !!

ناصر الياسري

الحوار المتمدن-العدد: 2475 - 2008 / 11 / 24 - 09:04
المحور: كتابات ساخرة
    

سمعت صوت خلف الدواح وهو يلعلع وانا اروم الدخول الى مؤسسة السجناء الاحرار
_ وروح شهيد المحراب .... ودفنات الصدرالأول والثاني ... ما خليت واحد منهم يتنفس.... صفيت الرفاق على حايط الفرقه الحزبيه وصليتهم صلي .. وواحد من الرفاق وكع على قندرتي ( أجلكم الله ) وكام ينحب مثل الحرمه ( مروتك سيد خلف الدواح .. آني دخيل عند جدك محمد ) !!
فقلت بداخلي ( كذبت ورب الكعبه ... لا تستطيع أن تقتل ذبابه .. فكيف بأبطال عزموا على مقارعة من حاول سرقة الوطن وبيعه لأيران ؟؟؟ )
سمعت المسؤول وهو يثمن دور خلف الدواح فى مقارعة النظام السابق !!!
فأجاب خلف الدواح برياء !!
_ أستاذ هذا بفضل المرجعيه الرشيده ودعواتكم المستمره ..... لنا نحن مناضلوا الداخل ... لكن ياحيف واحد من الرفاق نافق علينه بعد انتكاسة الانتفاضه الشعبانيه ونحكمت مؤبد !
فقلت بداخلي ( عن أي مرجعيه تتكلم ايها الدعي بن الدعي .. أنت لاتعترف حتى بالله !! )
فتسائل المسؤول
_ العفو سيد خلف شعجب ( صدام ) ما عدمكم بعد انكفاء الانتفاضه ؟؟
فأجابه بنفاق واضح
_ أفه عليك أستاذ ... غير هذا بفضل أهل البيت الأطهار ودعوات المرجعيه و الساده آل الحكيم مثل ما كتلك ..... وثانيا أعمامي دفعوا رشوه للقاضي وغيرو الماده من قتل الى سرقه ونهب المال العام اثناء الانتفاضه المجيده المباركه !!
( لم أتحمل كذب ونفاق هذا الدعي فحاولت أقتحام غرفة مدير المؤسسه لكنني تريثت قليلا كي اسمع باقي كلام هذا الداعر ) !! .
سمت صوت المسؤول وهو يطلب من الفراش جلب شاي لضيفه خلف الدواح فقاطعه خلف قائلا
_ شكرا أستاذ تره آني صايم .... دائما أصوم الخميس والجمعه والسبت والاحد من كل أسبوع بالأضافه الى اربع اشهر من السنه من غير شهر رمضان المبارك ثواب لشهداء آل الحكيم وشهداء الأنتفاضه وللشهيدين الصدريين !!
فأجابه المسؤول
_ بارك الله بأيمانكم ووفائكم لشهداءنا الابرار
فقلت بداخلي ( كذبت ايها المدع .. البارحه كنت تحتسي الخمرعند جماعتك .. فأين صيامك وتقواك... وانت الذي أخبرتني قبل ايام بأنك مطلوب 28 يوم صيام من شهر رمضان الماضي !!؟؟)
شاهدته وهو يخرج علبة السيكاير ويقدم سيكاره للمسؤول قائلا
_ تره الجكاره متفطر .... كما ذكر الشهيد الصدر الثاني في رسالته العمليه !!
فتسائل المسؤول
_ ليش انته ألمن تقلد سيدنه ..... مو السيد السيستاني ؟؟!
_ والله جنت أقلد السيد الصدر الاول وهسه أقلد الشهيد الصدرالثاني وعند يصبح السيد القائد مقتدى الصدر اية الله ومرجعا سوف اقلده على خطى آباءه اجداده !
_ زين استاذ خلف عندك وثائق ... شهادات وفاة ..... قد تحتاجهه بمعامله التكريم مالتك في مؤسسة الشهداء بالأضافه الى مؤسستنا ؟
_ تأمر أستاذ عندي شهادات وفاة أخوتي الاربعه المعدومين بزمن النظام .. وعندي شهادات أستشهاد زوجتي الزغيره على أي جلاوزة النظام اثناء انتفاضه النجف عام 1977 وعندي شهادات وفاة ولد عمي السبعه المشاركين في محاولة اغتيال صدام بالدجيل وعند شهادات وفاة عائلة خالي منكاش الوكع عليهم صاروخ اثناء الحرب ضد ايران الاسلاميه الشقيقه ومات منهم عشره !!
قاطعه مدير المؤسسه قائلا
_ استاذ خلف انتم عائله منكوبه !!
فأجاب خلف الدواح بدهاء !!
_ بل قل يا استاذي العزيز أنها عائله محظوظة وليس منكوبه .... محظوظة بشرف الاستشهاد .. محظوظة بشرف الحفاظ على مذهب أهل البيت .. محظوظه بتكريمها فى زمن حكم بها العراق اتباع أهل البيت العراق بعد 1200 عام من عار السقيفه !!
أحس مدير المؤسسه بالحرج وردف قائلا
_ بارك الله بكم .... بارك الله بكم .... سيدنه ... أكمل سفر نضالكم المرير !!!
وعندي قرار حكم بالأعدام بعد مشاركتي بمحاولة اغتيال عدي وعندي وثيقه مهمه تعرض لأول مره ومن خلالكم تثبت مشاركتي بمحاولة أغتيال عزة الدوري فى كربلاء ....أما آخر مشاركاتي النضاليه فهي تطهير أحياء العامل والشعب وبعض المناطق من بقايا النواصب الذين ناصبوا العداء لأهل البيت برفقة شيخ المناضلين المؤمنين ابو درع حفظه الله ورعاه واعاده الى ديار الوطن بسلام من الجاره ايران !!
(عند هذه اللحظه قررت ان اقتحم غرفة المدير .. وعندما هممت بالدخول تفاجأ خلف الدواح بدخولي ونهض معانقا وهويردد )
_ ابن الحلال بذكره .... هذا السيد الجليل بن الرسول خير شاهد على ما أقوله وقلته لاحقا ... سيدنه بداعة عزيز كلبك جلال الدين الصغير .. وبداعة نظر عينك الحاج هادي العامري ... سولف للأستاذ شسوينه بالجماعه أثناء الانتفاضه المباركه وبعمليات التطهير الأخيره ضد النواصب مع المجاهد الكبير ابو درع حفظه الله ؟؟!!
( تسائلت بداخلي ... كيف يريدني هذا الكذاب ان اكون شاهد زور بحوادث وهميه ) ؟؟!!
ثم التفت الى مدير المؤسسه قائلا
_ هذا السيد واحد من ابطال الانتفاضه الشعبانيه وكثيرا ما تحمل قهر وعذابات سجون النظام السابق وقد قدم اربع شهداء من عائلته والعشرات بل المئات من اصدقائه واحبائه قربان للثوره الاسلاميه وعربون وفاء للمرجعيه الشريفه .... وقد اشترك معي في مقاتلة النظام السابق في الاهوار وجبال كردستان ومقالع الرمل والحصو في الرزازه !!
ففاجئه المدير قائلا
_ السيد زين أعرفه من زمان ... ماله شغل بهذي الامور .. واصلا كان مؤمن أيمان كامل بحتميه وعدالة مقاتلة الثوره الايرانيه منذو بداية العدوان الصدامي على الجمهوريه الاسلاميه الايرانيه ... وكذالك لم يكن موقفه واضحا من الانتفاضه الشعبانيه لكنه لم يقاومها و الحمد لله ..... ولو عندنا مأخذ على موقفه هذا الا انه لم يكن بعثيا بل قومي الاتجاه !!!
تفاجا خلف الدواح بحديث المدير الغير متوقع فأجاب بأرتباك ظاهر
_ لا .. لا .. استاذ تره انته متوهم ..... السيد كان له الدور الكبير في صمود الانتفاضه في المدينه لأطول فتره ممكنه من خلال اسناد ودعم المقاتلين بالماء والغداء وشربت البلنكو وبدعواته الأيمانيه المستجابه !!
( ثم التفت خلف الدواح نحوي محاولا تغيير دفة الموضوع قائلا )
_ شنهي السالفه سيدنه يمته رجعت من زيارة الرضا ...... يمكن ما فاتتك زيارة قبر الامام السيد الخميني قدس سره الشريف .. وأكيد .. أكيد رحت لكاشان وزرت قبر الصحابي الجليل أبو لؤلؤه ... أكعد . دكعد .... خل نشبع منك شوف ... جن شوفتك مثل هلال العيد !!
(جلست بالقرب من المدير ثم وجهت كلامي لخلف الدواح محذرا !! )
_ شوف يا خلف ... آني أستمع كل حديثك وسوف أستفسر عن كل كلمه بدرت منك !!
( فأجاب بخنوع وتوسل بعد ان أحس بخطورة الموقف أما المدير) !!
_ أسئل سيدنه وآني عبد ك الزغير ... اروحلك فده للتراب التمشي عليه ورح السيد الخميني قدس سره الشريف !!
فاجبته بكلام حازم
_ يقولون ان تاريخ الانسان موشوم على جبينه لا يمكن أخفائه .
_ منو يكول ؟؟!!
_ آني .... !!
_ أذا أنته كايله .... آني أشلون أجذبك وانته بن الرسول .. حسبالي حاجيهه واحد من العلمانيين الكفره !!
_ انته شلون تكول بأنك مشترك بالانتفاضه الشعبانيه ونحكمت مؤبد ... أنته مو بكت المولدات مال الفرقه الحزبيه اليم بيتكم وبعتهن وشردت لمخيم رفحه ؟
_ حجيك صحيح ... غير آني بعت المولدات لأيران وأشتريت بيهن سلاح للمقاومين من فيلق بدر .. وثانيا أني أستشرعت عند السيد قبل ما أبيعهن وكال عملك حلال شرعا على وجه الوجوب !!
_ زين .. انته وحيد لبوك .. شلون تكول عندي أربع اخوه معدومين !!
_ لا سيدنه.. ذهوله أخوتي من رجل أمي الثالث ..حجي قلي كبابي !!
_ يله قبلنه بولد كبابي... شني سالفة زوجتك الزغيره المشتركه بنتفاضة النجف عام 1977 ؟؟
_ هيه موزوجتي .. لكن أبوهه جان أمواعدني بيهه !!
_ زين ولد عمك السبعه العادمهم صدام أمنين أجوك .. مو تكول آني مكطوع من شجره .. لا عم ولا خال ؟؟
_ سيدنه كول غيره .. كالوه جنت تشتغل بالتحقيقات .. قابل آني أجذب عليك لو على الاستاذ ؟؟
_ زين هاي راح انمشيهه الك ... شلون تكول آني مشترك بمحاولة اغتيال عدي وانته جنت بذاك الشهر مسجون بتهمة الزنه بالمحارم ؟؟
_ سيدنه اليسمعك شكول ... غير جسومه تصير بت مرة أبويه من رجله الثاني وتحل عليه .. وجانت أمه تكرهني وراح أشتكت عليه وذبوني بالسجن ظلما وعدوانا !!
_ زين أذا انته بالسجن شلون أشترك بمحاولة الاغتيال ؟؟
_ شني السالفه سيدنه غير أني خططت للعمليه بالسجن والمؤمنين بالخارج نفذوهه !!
_ ولك انته مونتكمرى ..لو رومل .. طركاه اللفتك !!
_ أفه عليك سيدنه .. ماخذني بعين الزغيره .. ولا جنك مشترك ويانه بكل العمليات الجهاديه .. تذكر من ردنه اغتيال عزة ابو الثلج بباب قبلة الحسين .. وانته شمرت الرمانه وما انفجرت ...هم كول هذا جذب ؟؟!!
_ ولله ياخلف الدواح انته للجلب تطلعله كرون .. ولك يا محاوله .. يا قنبله .. من طركاعه وكعت على راسك !!
_ سيدنه لا تحاول اخفاء تاريخك النضالى المجيد .. تره الاستاذ كلش يعرف عنك !!
_ شوف خلف كلشي راح اصدك منك فد شغلة تطهير احياء الشعب وحي العامل ويه ابو درع شلون دبرته ؟؟
_ سيدنه تريد الصدك .. آني بالغت بالموضوع .. أصلا آني ما شايف الشيخ ابو درع !!
( عند هذه اللحظه التف مدير المؤسسه ووجه سؤله لخلف الدواح )
_ يابه أستاذ .... صايرلك أسبوع تثرم بصل براسي ومسوي روحك مناضل .. من انعل ابوك يابو نضالك .. يا كلب بن صطعش كلب ... الا اخلي جماعة بدر يزرفوك بالديلات !!
فأجاب نائحا ... مروتك أستاذ سلمني للقاعده ولا تسلمني بيد فيلق بدر !!
فقاطعته قائلا .... لآ أستاذ ( مو فد هاي اصلا جان يشتغل مشخص ويه الامن بعد قمع الانتفاضه الشعبانيه !!
( فما كان من خلف الدواح الا ان يصيح بأعلى صوته .. آني دخيل عد جدك محمد .. التوبه اذا اجذب بعد ( ثم دنا نحو حذائي محاولا تقبيله ) فتهرته قائلا
_ كول آني مره !!
_ عمي آني مره . وداخله على الأجاويد .. بعد شتريد ؟؟
_ كول آني قشمر !!
_ عمي آني أكبر قشمر ... وأكبر مطي !!
( حينها طلب المدير من خلف الدواح اعادة كافة المبالغ الذي استلمها من المؤسسه ... فما كان من خلف الا وان مد يده الى جيب سترته واخرج حزمه من الاوراق فئة مئة دولار ووضعها بيد المدير قائلا
_ وروح السيد هاذه العندي .... حتى كروه ما بقتلي !!
( فتعلق المدير بياقة خلف الدواح وسحبه اليه ثم مد يده الى حيب خلف الداخلي واخرج حزمه من الدولارات وهو يتسائل
_ لعد هاي شنهي ؟؟
فأجاب باكيا وداعة مسعود البرزاني وراس جلال الطالباني ..... هذا خمس الساده !!

#ناصر_الياسري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات