البنات مش للبيع يا عم الحج

مريم الصايغ

الحوار المتمدن-العدد: 2449 - 2008 / 10 / 29 - 02:55
المحور: حقوق المراة ومساواتها الكاملة في كافة المجالات
    

صباح الفل ... إيه يا ناس خير زهقتونا ... كل شوية تقولوا عوانس ... عوانس وأن الذكر نصيبة منكن يجي أربعين أنثى
الله ما نركز سوا شوية ... هي البنات عنست من إيه ؟؟؟
مش من التضخم والفقر والفساد ومن الشباب اللي قاعدين على القهوة عاطلين من غير شغل
طب قبل ما تعايروا البنات حلو مشاكل وعقد الشباب الأول وعشان تستريحوا بقه في الأول والآخر ...
لا تعايرني ولا أعايرك الهم يا خويا صيبني وصيبك - وعجبي -
نرجع لموضوعنا ...
* الحج من دول مهو خلاص ما بقاش شاب لأنه فضل عاطل شوية وبعدين اشتغل وطلع عينه شويتين و كون قرش - لالالالالالالا قرش إيه ريال أصل كله خليجي يابا - فقرر يكافيء نفسه ... - ونعم المكافأة -
قرر يبقى مزواج - بدل يا حرام ما يغضب ربنا وتزوغ عينه أو يدور على العرفي -
ونسي العبيطة اللي اتجوزته وهو عاطل واستحملت فقره وصرفت عليه هي وعيلتها لحد ما ربنا شاف تعبها ونفخ في صورته وخلاه يسافر الخليج - بعد ما باع كل اللي حيلتها ودفعه للكفيل كل دا عشان يعمله ريالين - وحقيقي الراجل ما قصر وعمل اللي عليه رمى لها - حبة صيغة على عدة موبين جديدة واستخسر فيها لاب توب لحسن تنحرف -
و عشان هو حقاني !!! خيرها تقعد معاه وتاكل وتشرب وتسكت
أو يطلقها ويرميها في الشارع !!!
الغلبانه يا حرام تبكي وقلبها يتقطع ... بسرعة يبهدلها ويمنعها تنطق ويقولها : أنا هخليكي بس عشان خاطر ربنا ... إحسان ...
وعشان خاطر الأيام السودا – وطبعا هو عايز يولع فيها عشان ينسى أصله –
لكن ما تقلقوش أول بنت روشة تتدلع عليه وتقوله لأنا للقديمة هيرمي القديمة وينسى .

وللعوانس قصص تانية ...
طب قولنا عوانس طب الشباب يسكتوا .... لالالالالالالالالالالالالا ...

لا دا أدم دا أبو الاختراع ... وإحنا يا عم في زمن الإنترنت ...

* شوية عيال لغات بقه وبتوع حركات وغراميات يراسلوا بنات أجانب على الفيس بوك من ( السيبر ) ويعيشوا الأخوات في الوهم
شويتين والبنات تحب وكل واحدة تيجي تنقذ ننوس العين في شارم تغيره وتأمركه وتهربه – نصيحة لو ما عندكش وقت خد بعضك بدل قعدتك على القهوة وتدخين البانجو من جيب أهلك أطلع على شارم في عوانس من بلاد الفرنجة جاهزين والبانجو يا عم free- - وأي خدمة يا أخ .

* شويه عندهم بقه قومية عربية يشوفوا بنات العائلات الثرية البنت تحب وتتعذب يقولها لازم تيجي – هون... أصل المايك والويب كام والرغي في الخلوي طول الليل مش مكفينه - تنزل البنت يصور لها كام شريط وياخد اللي حيلتها ويعمل موقع ويهدد أبوها هتدفع ولا أذيع ؟؟؟
يصرخ الأب حلفتك بالغالي ماتذيعش وياخد عينه وفوقيها بنته - دا إذا وافق يتجوزها بعد ما غرر بيها - .
* في بقه شباب على قده يرسم على بنت الحارة بنت المعلم أو على بنت رئيسة في الشغل أو على بنت صاحب الشركة ويعيش بقه متهني ...
وياريت بعد دا كله يخلص للبنت المسكينة لا دا عمره ما بيشبع وكل مرة يحط أهداف وأمال عريضة يحققها مع كل فريسة جديدة .
* لكن مع كل دا ...
عمر الشباب دا ما بيعرف طعم الفرحة لأن أفراحهم دي بتكون وقتيه لأن اللي يتبنى على باطل يفضل طول عمره باطل
بيت مالوش أساس في لحظة يقع ويتهدم
إنسان بلا مباديء بيجي غيره أسوأ منه يطحنه .
عشان كده أحسن ليك تتعلم شوية مهارات تفيدك وتشتغل أي شغله شريفة - عشان مع الأزمة الاقتصادية وتفشي الفقر في العالم مع الوقت مش هتلاقي ولا بنت تصرف عليك - أنقذ نفسك بدل القهوة والإنترنت والفراغ والأفلام والوهم !!!

ناس هتقولي يا بريئة أنتي عايزة تفهمينا أن البنت ملاك ...

هلحق نفسي بسرعة وأقول لا مش ملاك لأن زي ما أدم أبو الاختراع حوا كمان أم الاختراع
* في بنات عايزة كسر ضوافرها وحرق هدومها القصيرة
لكن حتى دول تمنهم غالي ويضيعوا حياة وفلوس اللي بيشتريهم ...
البنات دي بتكون عارفة كويس هما عايزين إيه وكمان عارفين مصيرهم إيه لكن مهما حققوا من مال أو سلطة أو شهرة كدابة ...
- عارفين أو مش عارفين - نهايتهم بتكون الشارع ومش بيفضل ليهم غير الحسرة والألم ...

* ولبيع البنات الصغيرين للأثرياء العرب حواديت كتيره قوي وجراح
عمرها ما بتخف ومشاكل عمرها ما تتحل عشان كده نفسي كل أب يرحم نفسه وبنته ويبقى راجل - مهما الفقر قهره - ويقول لكل تاجر جاي يتاجر ببنته... بنتي مش للبيع يا عم الحج .

* مش هخلص كلامي من غير ما أتمنى أن كل بنت ترفع شعار الجواز اللي مش على أساس سليم قله قيمة وقلته أشرف .
* قولي لكل تاجر جاي يبيع ويشتري فيكِ أنا مش للبيع يا عم الحج أكيد ساعتها حاجات كتير هتتغير في حياتنا ولو عنستي هتعنسي بشرف وسعادة أحسن ما تنحسب عليكِ جوازة وتدفعي تمنها غالي .
وعايزة أختم بكلمة أوعوا في يوم ننسى أن ربنا موجود ... موجود من غير حدود .
كليوباترا عاشقة الوطن .

#مريم_الصايغ (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات