وزاره الزير

عمر ابراهيم الجنابي

الحوار المتمدن-العدد: 2230 - 2008 / 3 / 24 - 11:12
المحور: كتابات ساخرة
    

يابه شلون و تاليه ويه شعيط و معيط و جرار الخيط شلون نحلها شلون نفرها ما اعرف
يكلك مره بوكت واحد من الولاة ايام الخلافه جان الخليفه ملتهي بنسوانه و الخمر و يلعب كونكان ويه الوزير ما احجيلكم شنو من قمارجي مرتب حته جان بلاس فيكاس يعرفوه
اجاله واحد كله مولاي الطريق من مدينتنه لمدينتك بعيد و ما بيهه مي بلكت تسويلنه حل
الخليفه شعيط الي هوه يظهر يصير جده لمعيط الي عدنه منه هوايه هسه لكالنه حل مو طبيعي كلهم يابه جيبو زير يعني حب بكسر الحاء ( يعني اذا الحاء قويه نجمعهه جمع تفليش ) و خلو عليه واحد يترسه الصبح و يطلع من الفجر وره حظر التجول يجيب ثلج من المعمل ابو مولده و يخلي بيه و الناس تشرب
وره فتره الي خلوه عل الزير كال اريد مساعد و المساعد راد مراسلين و المراسلين رادو مساعدين و جيبه وودي و حسابات و قانونيه و اداره افراد و ذاتيه لمن صارت وزاره الزيـــــــــــــــــــــر
و حالنا هسه بزمن معيط الحفيد المفدى لشعيط ما اختلف حتكولون شلون شنو الفلم انت تخبلت ؟؟ ذاك وكت و هسه وكت و جانوا عل بعير و هسه بالبيكم اكلكم يابه تره نفس الشي كلهه نعمه الله
مثلا جم وزاره زايده عدنه ؟؟؟؟؟
نحسب لو نسكت
لا نحسب نبدي بوزاره الحوار الوطني الي ما الها مقر و لا اي نوع من انواع الدوام و صالح المطلك هوه الي يترس الزير و يدفع رواتب من جيبه خطيه
زين وزاره المرأة مو قصدي اقلل من المرأة بس قصدي الوزاره نفسهه وينهه منو يندل موقعهه عل خريطه ؟؟؟ حته بالمنطقه الخضراء ما الها مكان بس بيهه 700 موظف يستلمون رواتب من جيب المالكي خطيه يصرف عل شعب
ماشي وزاره البيئه عله عيني وراسي البيئه و عله كوله سعودي بيئه شي ؟؟ لا ما بيئه اوووووووف منك يا لساني وينهه الوزاره وين البيئه لو بس عقد الملصقات الي كلف مليار دينار عراقي و انطبعت بس النسخ الاوليه و راحت فلوسه و حته لا يكولون جذاب اني هم جتني حصه من فلوس العقد جتني 30 ورقه خضره مغمضه
وراها عرفت ماليش
يلا نكمل
وزاره البلديات و الاشغال العامه !!!!! منو هاي شنو هاي ؟؟ زين مو عدنه وزاره الاسكان و التعمير ؟؟؟ ذوله لويش ؟؟
وزاره حقوق الانسان !!!!!! هوه وين الانسان حته همه حضرتهم يخلوله حقوق
وزاره العلوم و التكنولوجيا ؟؟؟؟ يعني فيما مضى و منريد نكول بوقت منو جان مركز البتاني و عدد موظفيه 200 شامل كل هاي الامور وساد الحلوك

و ما بقه بس وزاره الزير و حيسووهه عن قريب بالتشكيله الجديده
شكول شحجي مولاي المالكي بلكت تخلي وزاره الالوان و وزاره الاسيجه الكونكريت و وزاره المي الخابط ووزاره سوك العوره ووزاره الملابس الداخليه الشرعيه و وزاره الخضورات و وزاره الدجاج البياض

يلا يجيك يوم تسوي وزاره تسميهه وزاره السماك و هم تسلمهه للاكراد حته يخبطوهه ويه وزاره كباب اربيل

يلا اكوم اطلع اشوف الناس شتسوي هنا احسن من ما اتذكر امور تغثني

تحياتي

#عمر_ابراهيم_الجنابي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات