الشَوَفان...!

ناني واصف
Hebrewnany@hotmail.com

2020 / 5 / 22

كلنا بلا إستثناء عندنا إحتياج فِطري دائم إسمه "الشَوَفان"..
الشَوَفان إحتياج إنساني طبيعي جدا داخل كل شخص مننا .. !
من وانت لسة طفل بيكون جوّاك الإحتياج دة ، تفضل تصرَّخ و تهد الدنيا لو ملقيتش حد جنبك أو باصصلك و مدّيلك إهتمام.
وتكبر و يكبر معاك الإحتياج ده و يفضل ملازمك طول عمرك.
بس مابينفعش تصرَّخ و تعيَّط علشان انت كبرت دلوقتي !!
انت محتاج تحس انك مِتشاف كويس ، و مِتشاف من جوة أوي ، مِتشاف من أعماقك زي ما انت كدة، محتاج تحس إن وجودك له قيمة، تحس إن اللي بتعمله مِتشاف و متقدَّر و بيفرق ، محتاج تحس إن نجاحك له قيمة و مسمَّع ، محتاج يتصقَّفلك لما تعمل حاجة صح , يتقالك إن شكلك حلو من وقت للتاني , تسمع و تشوف إنك مُهم , إنك تكون عايش في دايرة قبول من المُحيطين بيك ، سواء أهلك أو أصحابك أو زمايلك في الشغل أو غيره. رغم عدم إكتمالك و معرفتهم و إدراكهم لـ دة.

محتاج من اللي قدامك يكون مُدرك و شايف ان الحاجات اللي بتعملها انت مش مُلزم بيها , لكن بتعملها علشان انت من جوّاك عايز و حابب تعملها , يمكن تكون مبتعملش حاجات فظيعة و اللي هو مافيش حد في الدنيا بيعملها غيرك , بالعكس بتعمل حاجات بسيطة جدا بس بـ طاقة حب تساع الكون ، بتعمل حاجات بسيطة جدا بس محيلتكش غيرها في إيديك تعمله ، بتعمل حاجات بسيطة بكل اللي فيك و كل اللي عندك.

و رجاء يعني حسسوا اللي حواليكم إنهم مِتشافين , مُهمين , فارقين معاكم و وجودهم له قيمة , قولولهم ده بشكل مباشر أو غير مباشر، بحاجة كنت عارف انه نفسه فيها , بكلمة في جواب بخط إيدك , بحضن , بصوت مسموع , بأي شكل الطرق كتير و مش هتغلبوا انكم تلاقوا طريقة .
و انت لو مش حاسس إنك مِتشاف من اللي حواليك , أطلب ده , أطلب ده بمنتهي الوضوح , قول إنك عايز تحس إنك مهم و وجودك له قيمة , قول إنك مش حاسس إنك مِتشاف.
راعوا مشاعر و إحتياجات بعض علشان مافيش وقت و الدنيا فعلاً مش مضمونة بأي شكل.



https://www.ahewar.org/
الحوار المتمدن