البصرة

جعفر كمال
j.kamal@hotmail.co.uk

2016 / 8 / 21

أرد لمة البصرة بخور المحبين
شايل شوگه فوگ الجفن وبلمعة العین
أرد الشادي النغمات.. يتناغى حچي بلون التلاحين
يضوي للملاگه دروب..
تتزاحم عليها فرحة الطيبين
أرد ردود للبصره..
وتيه بزحمة العشار.. أتسوگ وفه شگابين..
طبع سوك المغايز، وذكرى حنا الشيخ
يتماسى ضوه مودين
عصرية البصره واهس الكورنيش
أردن للمحبه ردود، وضيع بشارع الحلوين
ودوخ ويّ الهرج ساعات
افوج الشط..
لن الشط يلملمني بحضن دافي
للتنومه تاخذني التلاحين
ناي ويسحر النغمه تلاوين
أتلاگه أبمضيف الگرنه وآهل الدير
ابحسنهم ظلو امخيمين
تهل روحي ضوه موده تروي گلوب متشوقين
أرد للبصره أبوس الگاع
الملم ريحة الخريط والبردي هوى الگاهن
وعانق عَلْ الچلچ صحبة هوى محبين
أتوسد علهَ الجولان أظل مسدوح..
أظل مسدوح
حتى كل رياح الغربه مني أتروح
أتبلل بمية الهور وناغي بالقصيده آحلام الحديثات
اتونس عشگ يلوي علًّ طاري اللون
ينسج بين گلبي وبين المحبين
أتفرفح رطب گنطار..
أظنه شفة حديثه على شفتي أتذوب
وآنه وياها بالشبكات ممهورين
نتلاگه مثل عود الگصب من ينتشر طوله
شفيف الهيبه عل الجرفين
نتلاگه حبايب..
لسَّهَ ما نوصل بيه سموم البين
مثل ما نلتگي هسْهَ
نسايم شاتله وياه عطر گلب البساتين
نتلاگه..
نضوگ الطيب من وجنات الملاگين
نتلاگه..
نذوب أحنه شگر بالچاي
احلى من الشگر أحنه ترى حلوين
نتلاگه..
أنامل نايمه بحنه ومسك وبخور
مدثرين ، مدثرين
احنه وي العشگ بالجوري مدثرين
*****
وعرفنه الصدگ ما ينباع..
يظل وجه الصدگ معلوم
يظل طبع الصدگ مصباح سر مدثر بنهرين
توهسنه المنافي وصابرينه العوز
وعرفنه للمخانیث بخرگ تنباع
شرد هدام، يا بصره انكسح هدام
شرد أبن الرذيله ومنبع الداء
يا هدام...
ظل شط العرب مايه يلوث أهلاي
وبقدرة ظلام أبنك عدي هدام
منع لگمة فقير يصيده من الماي
وگال الما يعجبه الگول يط راسه بحذه عداي
تعلمنه ونشرنه نصوص للتنومه والعشار
وعرفنه الما نسه أصله شديد الغيره والإحسان
حلم فوگ الوجن عالي يفيض بطيبة الوجدان
شوباش الوطن شوباش
إلك يا هالوطن گلنه نزف أشعارنه شموع
تضوي گلوب اهلنه بطيبة الوجدان
وطواري مجد أهلنه الحكمه موزنه بالف عنوان
وابن الأصل مهما گبر یحمل مقامه ویاه
محمول على مهد الرضاعه وشبتَّه وآصله
وبقينه احنه نناغي " الچا " " والماگو " وشغفه
بمضيف اطياب أهلنه وجمعة الخيرين
توهسنه المنافي وما نسينه وگفة التنور
وظل بيدرهوانه وي السنين ينور
وظل أبن الزنا أبن المجيد بخيبته معجون
رعاع من الأشم يا بصره مرعوبين
توهسنه المنافي والكصص تنباس
ياوسفه..
حدر ذل المچافی بصرتي مسبيه بالوسواس
أوره كل باب حطو خاين وجساس
يفرعون الگحيله وللسبايا گالو تردين
ما ضنوا البصريه علم.. حكمه.. وحسن.. هيبه
تطيب الملگه بين الناس
نشمية الطوارف مسك أنفاسه فاح أبتسم نواس
بنت الفجر.. لون الشمس.. نسمة دفو تشفي البدن والراس
خمريه الوجد.. شیاتة العينين
حلم كل المشوّ عادوا مثل طول الگصب..
لأن أصل الكصب ما ينزرع مرتين
******



https://www.ahewar.org/
الحوار المتمدن