گام الداس ی-;-ا عباسی-;-

سامي عبد المنعم
samiabdalmnem@hotmail.com

2013 / 8 / 2

گام الداس ياعباس
سامي عبد المنعم
الداس ضل ما ينحمل
وصرنه غنم گول وفعل
كل يوم يحكمنه خبل
إمعمم أو لابسله مداس
گام الداس يا عباس

لابس إمداس أو يفتهم
أو يتحده كل اهل العلم
كل ساعة جايبله فلم
يضحك على عقول الناس

الناس سكره ابلا خمر
رأسا إينفذون الامر
إيخوفوهم إبيوم الحشر
إيخلون عدهم وسواس

وسواس وإشوية حچي
إيختمونها إبنوح أو بچي
الشيخ گاعد منتچي
والشعب صاير كناس

كناس صار إبن الوطن
متحمل أنواع المحن
اللي إنعدم واللي إنسجن
والصار جثه إبلا راس

اللي إجانه إمنلغرب
دكتور صاير من چذب
إبيومين سواله حزب
أكبر عميل أو دساس

الدساس منريده بعد
من شفنه چم أثول وغد
بالمذهب إعلينه صعد
أو هوه رئيس الانجاس

الانجاس صاروا تجار
واحدهم أصبح منشار
بعده الحبل عالجرار
أو صار المنافق عالراس

عالراس حطيناهم
أو أسياد سويناهم
ما فاد كلشي وياهم
وإعرفنه طبع النخاس

النخاس ماعنده ذنب
متخفي بثياب الحزب
المفروض لما ننتخب
نعرف الزين إمنلناس

إبطب العدالة إمسطره
اولادنه أو لا من دره
ياهو الذبحهم يا تره
مجهول لو فد علاس

مجهول قاتلنه صبح
أو تحقيق چذابي إنفتح
والبرلماني منإ إنفضح
طاحت إبراس الحراس

الحراس من أهل البيت
شما بگت وإشما سويت
وإشما جبت وإشوديت
ضيع خبر گص الراس

راس الشليلة مختبص
وإمدومن العنده شنص
والزين ينباع إبرخص
چي بالرجل ضل ينداس

ينداس چي ما مرتبط
أو مامنتمي الاهل الشفط
كل حصته من كل النفط
البچي أو تطبير الراس

صارت حكومتنه حصص
ذاك الخسر هذا الچنص
الدوني عالكرسي نبص
والراس بي مية فاس

الفاس بالهامه وگع
وشگد حچی-;-نه أو ما نفع
مستر إبريمر من شلع
خلانه ناس اتسب ناس

بريمر سرق كل الامل
جابلنه أحزاب أو ملل
والطائفية أم العلل
خلتنه ما عدنه أحساس

الاحساس من عدنه إنعدم
وللاجنبي صرنه غنم
لو إنعض مية إصبع ندم
الخلل أصبح بالساس

بالبوس لمينه الشمل
والچان علاس أو نذل
أصبح نزيه أو معتدل
أو من خده لازم ينباس
گام الداس ياعباس



https://www.ahewar.org/
الحوار المتمدن