بجاحة معتدى من هنا

إيرينى سمير حكيم
jepols_potros10@yahoo.com

2012 / 1 / 31

اوعاك تفكر انك عايش فى بلدك واللا بتمارس حرية من حقك

واللا الأرض ارض أبوك واللا التراث تراث جدك

واللا تكونش فاكر انك زى ما تحب تقدر تعبر عن رأيك

واللا انك تقدر تحط هدف وتوصله ومتكونش إرادتنا زى إرادتك

لا فوق واعرف حقيقة حياتك .. انت عايش بس هنا عشان تقضيها ليوم مماتك

ولو كنت فاكر إن ليك حق .. فكفاية عليك أنفاسك

واعرف انك بتخدمنا برقم فى بطاقتك .. وعليك واجب تحمى أسيادك

ما تحط لسانك فى بقك وتبطل صراخ وهتاف لحقك

خلاص ما حنا خدناها أكلناها بلعناها .. وده من زمان حصل وكان بإرادتك

مين كان ضربك على ايدك؟ جاى دلوقتى وبتسال ليه ابقى سيدك؟

وانت ياللى كنت ساكت اتخرست ليه على طول ماضيك

جاى دلوقتى تقول ماختارتش والانفعال ماليك؟

طب روح انت وهو دور على حق دور على ثورة يمكن قيودك تنفك

لكن لحد ما تقدر تواجهنى بيننا زمن وابقاق ساكتة وصك

انا اخترت حريتى ونجحت ولحد ما توصل لحريتك انا عالكرسى بَحكُمَك

تقدر تقول ذكى تقدر تقول معتدى لكنى وصلت .. وبحُكمَك

بينى وبينك كده .. ليك عندى حرية احتلتها وحبستك

وخللى بينى وبينك ماشية صفقة على عيشك وأكلَك

إنما لو صممت على صرختك .. غامر برغيفك، غامر بأمنك، غامر بعمرك

غامر عشان حريتك وضحى عشان إنسانيتك



https://www.ahewar.org/
الحوار المتمدن