قصاقيص، اتجننت فى سجن المرج - 26

مايكل نبيل سند

2012 / 1 / 17

- نص فترة كريم
كل لما أفكر فى طول فترة الحكم بتاعى (سنتين)، أفتكر ان كريم عامر اتسجن 4 سنين، وكان متباع أكتر منى مليون مرة… أنا اتحكم عليا بنص المدة اللى قضاها كريم، رغم انى كنت خارب الدنيا أكتر منه مليون مرة… الكون مش عادل! 2011/12/16

- الذين صمتوا
اللى ظلمنى مش الجيش… اللى ظلمنى هما اللى سكتوا على العنصرية المجتمعية ضدى طول السنين اللى فاتت، واللى سكتوا على انتهاكات الجيش المستمرة ضدى. 2011/12/16

- مناظرة علنية
ظباط الجيش مستأسرين (عاملين نفسهم أسود) وكل يوم طالعين فى الجرايد والتليفزيونات يقولوا أكاذيب عنى، وهما عارفين انى مسجون مش هعرف أرد على أكاذيبهم… إذا كان ظباط الجيش (وقيادات المجلس الأعلى للقوات المشلحة) عندهم الشجاعة، فأنا بدعوهم لمناظرة حية على الهواء مباشرة فى أى موضوع يختاره… ايه النظام بقى؟ 2011/12/16

- إسائة معاملة
فيه مساجين كتير بيعاملونى وحش جداً… كتير بحس ان فيه مصريين كتير ميستحقوش التضحيات اللى اعتملت علشانهم. كتير من المصريين ميستحقوش غير مبارك وطنطاوى وعبود الزمر… مفيش ملاك هييجى بالانتخابات فى مجتمع شياطين! 2011/12/16

- الجنزورى والتجربة الصينية
الجنزورى كل اهتمامه بالاقتصاد والأمن، وملهوش دعوة بالسياسة أو الإصلاح السياسى… دة نفس الخط بتاع الحزب الوطنى اللى كان بيكرر التجربة الصينية المبنية على الإصلاح الاقتصادى مع الاستمرار فى الاستبداد السياسى! 2011/12/20

- السجن هو
السجن فى ظل نظام يوليو العسكرى هو مكان بيقوم فيه المجرمين بتقييد حرية الشرفاء! 2011/12/21

- البريد فى السجن
بنبسط جداً بالجوابات اللى بتوصلنى فى السجن، ودة بيرفع معنويات جداً… مش بستغرب من الجوابات اللى بتجينى من أوروپا وأمريكا وكندا، لكنى مكنتش أتوقع انه توصلنى رسايل من دول زى البحرين وكوريا الجنوبية. بتوصلنى رسايل قليلة جداً من إسرائيل، بنبسط بيها، على الرغم انى زعلان من قلتها… الحرية جاية لابد. 2011/12/22

- المتهم مدان حتى تثبت براءته
الجيش عمال يصرح فى الإعلام ان الحكم الصادر ضدى سببه انى معرفتش أنفى عن نفسى التهم المنسوبة ليا. قمة السفه… هو ايه الأصل فى الأمور! ان المتهم برىء حتى تثبت إدانته، ولا انه مدان حتى تثبت براءته؟ الأصل فى الأمور ان الإنسان برىء، ويصدر حكم ضده إذا وجد دليل يثبت إدانته، وإذا لم يوجد دليل يجب تبرئته حتى لو كان ارتكب جريمة فعلاً. لكن فلسفة توزيع الاتهامات على الناس بدون دليل ومطالبتهم بإيجاد دليل على براءتهم، عبث قانونى مش موجود فى أى دولة محترمة. 2011/12/22

- نسيت الكيبورد
حاسس انى بسبب طول فترة الحبس، نسيت أماكن الحروف على الكيبورد… اللعنة. 2011/12/23

- القضاء المدنى لا يقل فساد
خبرتى فى التعامل مع القضاء المدنى بتقول ان القضاء المدنى مش أقل فساد من الشرطة أو القضاء العسكرى أو محاكم أمن الدولة أو أى مؤسسة فاسدة تانية… القضاء المدنى هو اللى سجن سعد الدين إبراهيم وكريم عامر وأيمن منصور، وهو اللى سجن أيمن نور وصادر حقوقه السياسية ورفض يعيد محاكمته بعد الثورة. القضاء المدنى هو اللى حابس علاء عبد الفتاح دلوقتى، وهو اللى ساعد مبارك ومن بعده طنطاوى على التلاعب فى نتايج الانتخابات… حتى فى وجودى جوا السجن، النيابة العامة بتتواطئ مع الداخلية وبتساعدهم على التهرب من العقاب على جرايمهم… مطلوب ثورة كاملة لتطهير القضاء. 2011/12/23

- محتاج محامى
مش معقول بقالى 9 شهور مسجون وطالب محامى يزورنى جوا السجن، ومفيش محامى بيمارس المهمة جه زارنى… أعتقد ان من حقى على المحاميين الثوار انهم ييجوا يزورونى ويساعدونى انى آخد خطوات قانونية ضد الانتهاكات اللى بترتكب ضدى فى السجن. 2011/12/23

- ضد الإشراف القضائى على الانتخابات
طول عمرى كنت ضد الإشراف القضائى على الانتخابات، ودة السبب انى ممضيتش على البيان بتاع البرادعى قبل الثورة… كنت عارف ان القضاء المصرى متأسلم وهيسلم البلد للإسلاميين. القضاء المصرى عنصرى ضد المرأة ودة كان واضح من رفضه لتعيين المرأة فى المناصب القضائية. القضاء المصرى عنصرى ضد غير المسلمين، ودة السبب فى الأحكام المقززة ضد الملحدين والبهائيين وأحياناً المسيحيين… فى الدول المحترمة بيبقى فيه مجلس قومى للانتخابات، بتتمثل فيه كل فئات المجتمع، وبيكون فيه دور أساسى للمجتمع المدنى، واحنا المفروض نعمل كدة لو حبينا نكون دولة محترمة ويكون عندنا انتخابات نزيهة. 2011/12/23

- المدافعين والمعارضين لما لا يعرفون
بستغرب من الناس اللى بتدافع عنى من غير ما يكونوا قروا مقالاتى. إزاى تدافع عن حد وانت متعرفش هو قال ايه؟ برضه بستغرب من الناس اللى بيهاجمونى وبيشتمونى من غير ما يكونوا قرولى حاجة. إزاى تهاجمنى وتنقدنى من غير ما تعرف أنا قلت ايه؟ مش يمكن لما تقرالى تقتنع باللى بقوله؟ الموضوع كله بيفكرنى بكل اللى دافعوا عن أو هاجموا سيد القمنى ونصر حامد ابو زيد وفرج فودة من غير ما يقروا أى حاجة من كتاباتهم… أمة لا تقرأ هى أمة مقززة. 2011/12/23

- الفتاة التى عروها
آلمنى جداً صورة الفتاة التى عراها جيش طنطاوى أثناء فض اعتصام مجلس الوزراء… أقول لها ان العرى ليس خطيئة، والجسد ليس عاراً، والكثير من الفتيات حول العالم يستجمون على الشواطئ بالبيكينى بدون أدنى مشكلة… انما العار والفضيحة والخزى يجب أن تلحق بالجنود الذين يتلقون مرتباتهم من ضرائبنا ليحمونا، لكنهم بدل ذلك يخونون الأمانة ويوجهون أسلحتهم تجاه مواطنيهم ويهتكون أعراض الشرفاء… كل العار والخزى للجيش المصرى وكل من فيه ويصمت على ما حدث. 2011/12/24

- الجيش طول فترة صراعه معاياً
كان المفروض أسافر أوروپا شهر 6 اللى فات، وكنت هبتدى ماچستير وبعدها دكتوراه، يعنى كنت هقعد على الأقل 5 سنين برا مصر… لكن الجيش بغباؤه حبسنى، وخلانى متفرغ للكتابة ضده، وحبس حرك ناس كتيرة ضد الجيش وبيساهم فى نزع شرعيته تدريجياً… اللى بياخد القرار جوا الجيش حاصل على تقدير امتياز فى الحماقة. 2011/12/25

- إضرابى والنحاس باشا
لسه عارف ان النحاس مات يوم 23 أغسطس… دة نفس اليوم اللى بدأت فيه إضرابى عن الطعام… سعيد بالصدفة دى، لأن النحاس يكاد يكون الشخصية السياسية الوحيدة اللى بحترمها فى تاريخ مصر المعاصر… وردة على قبرك يا زعيم الأمة. 2011/12/25

- طبيب الأسنان
أكاد أتعجب من شجاعتى فى مواجهة الموت، ورعبى الشديد من طبيب الأسنان… كم هو عجيب الإنسان! 2011/12/26

- كام إخوانجى استشهد فى الثورة؟
احنا عارفين ان الثورة اتقتل فيها مسيحيين ومسلمين، رجالة وستات، كبار وصغيرين… لكن السؤال الحيوى: كام عضو فى جماعة الإخوان المسلمين اتقتل! 2011/12/26



https://www.ahewar.org/
الحوار المتمدن